【頭條獨家】人生不用一馬平川蘇慧恩遇波折更懂珍惜

2019-11-26 20:26

蘇慧恩（Ophelia）最近推出新歌《一馬平川》，她選擇用這個較冷門的四字詞做主題，只因她認為每個人都希望一生能風平浪靜，好似一馬平川一樣，但她反而認為遇到波折會令人更加珍惜所有，正如她由自資獨立歌手，到現在簽了公司，早已體會過一腳踢艱辛的她，更感激有團隊照顧的幸福，專心做好音樂答謝支持她的人。採訪：杜淑霞場地：Redmr

外表柔弱的Ophelia，自言是個女漢子，「可能細個父母工作都忙，我除咗照顧自己，仲要照顧埋細佬，習慣咗獨立，好多嘢都係靠自己，讀大學時半供讀，連保安員都做過，不過因為呢啲經歷，我自資做歌手嘅日子，仲要兼顧做模特兒、主持同製作網片，自己一腳踢都完全冇問題。」

簽公司增曝光
正因以往的經歷不是一帆風順，令Ophelia想到新歌主題，「我聽到首歌嘅時候有種一望無際嘅感覺，我就諗到一馬平川呢個四字詞，想到好多人都希望人生係平坦嘅，但係我覺得太冇風冇浪，反而到成功嘅時候，可能唔會覺得特別開心，雖然我仲距離成功好遠，但依家簽咗公司，好多嘢有公司同同事幫我打點，唔使再孤軍作戰，真係覺得好幸福，會珍惜依家有嘅機會，專心創作更多好嘅作品。」

講到早前為《一馬平川》到日本拍攝ＭＶ，Ophelia繼續發揮一腳踢本色，「今次我繼續搵咗我表哥做導演，我哋得四個人用咗四日三夜去完成咗兩首歌MV，化妝整頭當然自己包辧，但係我唔覺得辛苦喎！」Ophelia坦言簽公司後最大得着是曝光率，「公司有好多業務，餐廳、房地產、美容用品生意都有，公司好自然搵我做埋代言人，自己多咗唔同平台出現，知名度都多咗啦！」