【頭條戲場】《茄哩啡事務所》快樂的Cult片

舊年上映，由日本新晉導演上田慎一郎執導的《屍殺片場》成功用指甲鉗鉗出一片熱帶雨林，以零卡士加超低成本300萬日圓（約21萬港元）拍攝八日，電影上映四個月贏盡口碑，總票房逾28億日圓（約1億9千6百萬港元），在港亦大收800萬票房，創下恐怖影壇神話，除咗講黐線無補充。導演有新作推出，《茄哩啡事務所》繼續走「我睇咗啲乜嘢」路線，感覺好兒嬉，好大學作品Feel，但你問我好唔好笑?呢六個月以嚟笑得最開懷一次就係睇呢套戲。(11月28日上映)撰文:廖思慧

電影開拍前，導演曾在全球舉行試鏡活動，反應超熱烈，最後在1500名參加者中選出15名零知名度的演員演出，再跟他們一起度劇本，達成真正的集體創作。

好有創意
《茄哩啡事務所》當然就係講老臨，但並非電影中喺主角後面行行企企或一出場就被殺嗰種。一副驚青樣嘅男主角和人(大澤數人飾)有正職但好鍾意做演員，閒時周圍試鏡搵機會，但奈何佢一緊張同被男人追問就會暈低，咁死啦。多得細佬宏樹(河野宏紀飾)，介紹阿哥去茄哩啡公司做嘢，公司乜Job都接，例如搵人做媒入戲院瘋狂大笑，又或職業孝子，和人可以發揮所長同賺錢，後者好重要。有一日，公司接咗一單踢爆邪教詐騙組織幸福丸嘅工作，和人兄弟被安排做前線深入虎穴，笑位多到癲，一講即穿橋，入場自己感受吓。