【頭條獨家】食店蝕錢個唱煞停 黃翊嘆就快要乞食

受社會氣氛影響，飲食業首當其衝，演藝界同樣受波及，等咗26年終於可以喺樂壇翻生的黃翊竟然「中」兩瓣，在大埔墟街市頂樓經營的食店生意急跌7成，每晚黃金時段得返幾枱客，蝕到入肉！原先打算明年4月喺麥花臣再開演唱會都急急煞停：「人哋張敬軒演唱會都要取消啦，你係黃翊啫，唔係叫取消，係收皮呀。再咁落去，我哋咪要eat banana？」採訪：方騫平

食店蝕錢，演唱會又被叫停，黃翊相當無奈，他說：「我哋做夜市生意更加難搞，因為交通問題，入夜啲人就唔出街，放工即返屋企食飯，扶老攜幼更加唔方便，怕冇車搭，之前黑衣人曾破壞過我哋熟食街市嘅大堂，要圍板裝修5日，加埋大埔堵路，做咗十幾年生意從未試過差成咁，好老實講，我都想你可以教吓我點算好。」

無晒辦法好頭痕
問到應變方法，黃翊坦言無晒計，「真係要去問高人，自問智商好低，諗唔到有乜方法可以解決到，我真係好煩。都冇乜應變辦法，因為食店喺政府大樓經已減租一半，所以申請唔到中小型飲食業應急錢，師傅做咗好多年就冇得Cut，一樣都係咁嘅糧，唯一盡量叫散工唔使返工。」黃翊愈講愈灰，「唯有堅守香港精神捱住先，頂得就頂，希望香港狀況可以平息得到，但相信需時較長。不過，因為過年後街市要大裝修半年，哈！嗰半年唯有拎枝結他去隧道乞吓食度日，到時經過見到黃翊唔好畀硬嘢，最少都畀兩條嘢我，要軟嘅。」

講到喺樂壇難得翻生，黃翊更氣餒：「我冇唱20幾年歌，直至兩年前受到大家注意可以出返嚟，諗住努力想做啲嘢，本身想再搞演唱會，依家都唔敢再搞住，好彩之前申請場地係後備第4，排到第3個已經攞咗個期，否則死得更慘。」