個唱如期舉行 Joey Tang獲眾星捧場好熱鬧

2019-11-21 12:36

Joey Tang（鄧建明）昨晚舉行《Music Playground 2019》演唱會，邀得陳慧琳（Kelly）、鄭中基、李克勤、蘇永康和側田等擔任嘉賓，可謂星光熠熠，而入場人士大部份為內地觀眾，場面熱鬧。蘇永康大讚Joey Tang是一位脾氣好的Team Leader，他坦言無論自己在海外或Big Four開演唱會都由對方擔任音樂監製，「我認為一個騷好需要EQ高嘅監製，因為要處理好多嘢，好在樂壇有Joey Tang咋。」Kelly則表示Joey Tang是她首位接觸的音樂人，好彩試音過關，才有幸在台上演出。在旁的Joey即說：「當日試完音見到Paco，我話唔係唔簽呀？佢笑笑口話簽咗啦！傻仔！」

身形纖瘦不少的Joey，透露7日前因牙患做完手術，但不會影響唱歌。談到邀得多位歌手任嘉賓，Joey表示全部歌手都曾經合作過好有淵源。談到最近香港社會氣氛緊張，他直言有想過將演唱會延期，但跟主辦單位方面分別有睇相士，也認為檔期可如期舉行。他說：「原來主辦方係我中學嘅師弟，呢幾日都驚交通問題，但佢信吸引力法則，我又跟佢學，跟住一路等，噚日就決定開騷。」