【維港會】落區被問催淚彈影響 高永文愈講愈激動

唔少市民關注催淚彈對市民健康是否有影響，網上流傳一段短片，前食衛局局長高永文在慈雲山，被人追問催淚彈對健康帶來的影響，更質疑佢迴避回題，高永文一度顯得頗「勞氣」。

片段約3分鐘，高永文身處慈雲山疑參與選舉拉票活動，有市民問佢面對大量催淚彈，市民健康如何獲得保障。高永文未及回應，對方仍繼續講話，高醫生即說「你講完話我聽，我先講；因為你係想自己講，定我講？」。

對方其後讓高醫生回應，佢就答「警察有佢哋嘅職務，去用最低武力保持社會嘅健康，但面對又汽油彈、又腐蝕性液體，又阻住市民返工生活，呢種情況我相信唔可以繼續。我知道青年心裡有一團火，不過，我話畀你聽，我30幾年行醫學習咗一樣嘢，就算自己認為好啱嘅......」，未講完就被市民截斷，要求佢回應催淚彈問題，希望高醫生以專業去解答人民健康問題，並非講暴力同汽油彈問題。

高醫生聞言即帶點「勞氣」回應：「如果你講到汽油彈同腐蝕液體對人身體有幾大傷害，我哋有啲執法人員受到二級、三級燒傷，仲喺醫院，佢哋將來面對係一個好艱苦嘅生活，我做醫生，我就知道，嗰啲汽油彈燒到人危殆呀！」

佢愈說愈激動：「我知道，我知道。每一樣嘢，每一件暴力都會對身體有影響，你有冇問過邊個人用暴力先？」佢未講完，對方就話無嘢問、明白佢嘅立場，短片就此結束。