【專欄】段校長，講人話

多年以來，小弟認識又訪問過多位大學校長，印象最良好的，前有學兄高錕教授（佢曾在聖若瑟書院就讀），謙謙君子，今有段崇智教授，同樣是胸襟廣闊，雅量極深。

兩位皆蜚聲國際學者，地位崇高，但沒丁點架子，更難得，富有赤子之心，真真正正關心同學。

點解我強調「真真正正」呢？因見過幾位擅長扮嘢大學校長，在記者鏡頭下就非常「親民」。嘩！一個轉身，立即「獨裁者」上身，對同事呼呼喝喝，人前人後兩個款也。

段校長一九六九年離港赴美求學，佢天分咁高，若要考入香港大學，本應無難度的，奈何，當年的段同學，早已有追尋尖端科學的心，故此，理所當然志向是一闖美國最高學府。有志者事竟成，終於段崇智成為國際推崇的人體肌肉骨骼系統專家。半個世紀後，回港出任中文大學校長。學術雖然超勁，但佢「錯過」咗香港多次震撼性歷史時刻，當然好難理解為何這個城市五十年後會「變成咁」。幸而，願意放下高高在上的權威及專嚴去吸取，兼願與同學講「人話」。故此，由被學生粗口「問候」到鞠躬握手由衷叫聲「段爸」，過程不簡單也。

中文大學最近幾頭痛，因不少碩士生來自內地，紛紛被「政治運動」震一震，令在讀的及本想申請入讀者大為猶豫，個別著名國際級學者亦對來港任教有疑慮，這個，間接影響大學經費及研究水平也。

點應付呢？幸而段崇智在國際學術界頗具江湖地位，只要佢主動邀請，相信各地名牌大學都願與中大做學術交流，開辦聯校課程。若如此，咁就「一失」變「多得」，因「逼」到中大加快與國際一流大學「接軌」也。
段教授為人極幽默，我問佢：「你當日被學生圍足幾個鐘，冇去過洗手間，點頂？」

「係呀，成五個小時呀。哈哈哈，證明我個腎都仲幾好噃！」

係咪貼地氣又講人話呢？祝佢帶領中大更上一層樓，在國際學術領域進一步騰飛！（曾智華）

全文刊於《星島日報》「阿碌開咪」專欄