【頭條獨家】孖老公連體湊仔 學霸何倍倩電腦不離手

「恒生新抱」何倍倩（Anina）近年為增值自己、讀完碩士再讀博士，她與老公何乃斌（Terrence）除工作外，全副精神都落在照顧3名子女身上。唔經唔覺，大仔Lawrence已經10歲，同學霸媽咪餅印一樣添。日前Anina偕老公帶Lawrence去跑馬地寓所附近的便利店買嘢，雖然是家庭樂，但Anina全程攞住部notebook、小小時間都心繫自己盤健康app生意㗎！  採訪：李維隆、李權威

擁有雙碩士學位的Anina，𠵱家正攻讀南加州大學的博士學位。讀咁多書，無非是為了將她創辦的健康app推廣開去。平日她既要讀書，又要打理生意，還要買餸煮飯和湊10歲兒子Lawrence及5歲龍鳳胎子女Clarence和Audrey，真係個多功能老婆！每次她現身公開場合，幾乎都手提電腦不離手，方便去到邊做到邊，分秒必爭！

青春晒腿
日前難得是假期，一身牛仔青春打扮的Anina晒長腿，與老公Terrence帶大仔Lawrence落街行吓。雖然係family day，Anina都拎住部手提電腦跟身，見她與老公一入店分頭睇雜誌，而囝囝就專注揀零食及汽水等。未幾，靚靚人妻先行步出，讓兩父子在店內慢慢揀嘢。約10分鐘後，兩父子一齊步出，見人夫手拎一本汽車雜誌離開，兒子就雙手fing fing，乜都無買，最後一家三口便散步回家。