【頭條獨家】打書釘狂睇哲學書 麥子樂向名導北野武取經

曾經同「契姐」佘詩曼傳出過戀情嘅前TVB藝員麥子樂(Bryant)，近年加入古天樂旗下後，工作量有增無減。日前傍晚，Bryant獨自現身銅鑼灣希慎廣場，見佢喺一間書店閒逛打書釘，主攻睇吓哲學書。逗留成個鐘，佢最後買咗本《北野武的下流哲學》返屋企慢慢刨，學吓點樣做人！ 採訪：梁志明

現年39歲嘅麥子樂，被指係「翻版林峯」，04年喺大台訓練班出身，眼見同期同學胡定欣和黎諾懿都有名有利，自己卻浮浮沉沉多年，前幾年遂離開無綫，去過港視拍劇，去年底加入古天樂旗下後，跟影壇新貴余香凝、廖子妤等做同門。早前，愛操肌嘅大隻仔有幸拍住鄭秀文參演電影《花椒之味》，戲中演廚師嘅Bryant話現實中同樣愛下廚，最叻煎牛扒及整磨菇湯，暫時只係煮過湯畀媽咪、佘詩曼和周家怡品嚐喎！

日前傍晚6時許，穿上黑tee、孭埋個黑背囊嘅Bryant獨自閒逛商場。見佢喺一間書店內打發時間，雙手插袋周圍行，行行吓主攻睇吓哲學書。其間大隻仔動作多多，又摸頸又托頭等，似乎幾無聊搵嘢hea吓。之後，佢睇中日本名導兼全能藝人北野武去年著作《北野武的下流哲學》。呢本係72歲北野uncle又一「人生哲學」力作，點醒你點做人嘅書。見Bryant好有興趣睇足二十分鐘，最後索性買埋走人。