【头条独家】打书钉狂睇哲学书 麦子乐向名导北野武取经

曾经同「契姐」佘诗曼传出过恋情嘅前TVB艺员麦子乐(Bryant)，近年加入古天乐旗下后，工作量有增无减。日前傍晚，Bryant独自现身铜锣湾希慎广场，见佢喺一间书店闲逛打书钉，主攻睇吓哲学书。逗留成个钟，佢最后买咗本《北野武的下流哲学》返屋企慢慢刨，学吓点样做人！ 采访：梁志明

现年39岁嘅麦子乐，被指系「翻版林峯」，04年喺大台训练班出身，眼见同期同学胡定欣和黎诺懿都有名有利，自己却浮浮沉沉多年，前几年遂离开无綫，去过港视拍剧，去年底加入古天乐旗下后，跟影坛新贵余香凝、廖子妤等做同门。早前，爱操肌嘅大只仔有幸拍住郑秀文参演电影《花椒之味》，戏中演厨师嘅Bryant话现实中同样爱下厨，最叻煎牛扒及整磨菇汤，暂时只系煮过汤畀妈咪、佘诗曼和周家怡品尝喎！

日前傍晚6时许，穿上黑tee、孭埋个黑背囊嘅Bryant独自闲逛商场。见佢喺一间书店内打发时间，双手插袋周围行，行行吓主攻睇吓哲学书。其间大只仔动作多多，又摸颈又托头等，似乎几无聊搵嘢hea吓。之后，佢睇中日本名导兼全能艺人北野武去年著作《北野武的下流哲学》。呢本系72岁北野uncle又一「人生哲学」力作，点醒你点做人嘅书。见Bryant好有兴趣睇足二十分钟，最后索性买埋走人。