「Big爆」沙律勇闖鬼屋 自認好大膽

萬聖節將至，張沛樂（沙律）日前獲邀勇闖「鬼屋」探險，穿上貼身衫盡顯「Big爆」上圍的她分享一件朋友遇到的靈異事件，她說：「我有朋友以前成日組靈探隊，有次去到一間荒廢學校，見到有兩個女仔喺課室玩掌仙，之後有人叫佢哋唔好玩，因為有攝影機影到一個紅衣女仔企咗喺兩個女仔中間，但之後睇番條片又搵唔番個女仔！」

雖然沙律從未遇過靈異事件，但對拍攝驚慄題材的電影深感興趣，她坦言：「我細細個已經好大膽，好鍾意睇恐怖片，我覺得鬼片係最直接令觀眾有反應，所以我好想挑戰拍鬼片，但我唔想做女鬼，想做被嚇嘅角色多啲！」

提到沙律與男友林耀聲拍拖以來一直感情穩定，她大讚男友有安全感：「因為佢係一個好專一嘅男仔，但其實佢都好悶，哈哈！佢唔會同你溝通好多，咁樣有好有唔好啦！」