【(＞﹏＜) 新娘大開中門有片睇】 Jessica@SG 生仔順其自然

Super Girls（SG）成員Jessica（蔡明思）與來自寶島的男友陳冠廷（Steven）今日在台灣結婚，除了隊友吳嘉熙（Cheronna）和陳穎欣（Yanny）做姊妹送她出嫁外，趙慧珊（Aka）亦於晚上飛到當地出席婚宴。問Jessica做新娘子的心情時，穿上超性感晚裝的她笑言：「好緊張但又好開心，因為佢哋全部喺香港飛晒過嚟台灣，所以我非常非常之開心，開心到其實我瞓咗兩個鐘，但我完全唔攰，我知佢哋都好攰，因為頭先一放空就見佢哋恰眼瞓，真係辛苦晒佢哋！」

Yanny聞言接着說：「唔辛苦！」Cheronna坦言：「睇住你出嫁真係好開心，我哋感恩可以陪住你出嫁。」Jessica即連番講多謝說：「佢哋真係幫咗我非常之多，頭先有好多嘢要執，佢哋不斷跑嚟跑去係咁幫我整，因為我着住婚紗好唔方便，所以我好似一個癈人咁企咗喺度。」Aka即表示唔緊要，因為是Jessica的大日子，Jessica笑言：「我真係好唔慣，頭先我好想除咗件婚紗走去幫佢哋。」Yanny大爆Jessica不停講「唔該」講咗100次，並叫她不要再講。

問Jessica覺得老公怎樣時，她笑言：「好多謝Steven，因為由籌備婚禮到結婚，一直都係佢跑嚟跑去，佢今日都係非常之忙，喺放空時仲要打電話幫佢哋訂飯盒，佢仲make sure佢哋一定要食到熱嘅嘢，佢真係好細心。」連Cheronna都大讚Steven真係好錫Jessica。至於兩人婚後有造人大計嗎？Jessica續說：「我覺得順其自然喇，如果有嘅都會好開心，但我唔想畀壓力自己。」姊妹們即齊聲祝她三年抱兩！