【頭條獨家】黃建東淡水情人橋博艷遇 望下次有女陪旅遊

黃建東早前趁住未開劇，同舞台劇演員朋友去了轉台北玩，但原來這是他人生第二次去台灣，由於他有接近20年冇去過，所以去玩和食的地方，都是港人去到唔去的地標。不過，阿東自爆此行仲有秘密目的，就是去淡水情人橋博有艷遇成功脫單，「希望下次有女朋友陪，唔使再兩個麻甩佬去玩啦！」採訪：杜淑霞

阿東上次去台灣旅行，已是中學時跟家人跟旅行團去玩，「我自己都覺得實在太離地，我又鍾意食台灣嘢，趁演完舞台劇，又未開王心慰監製嘅新劇《失憶24小時》，淨係拍《絕世港佬》，咪抽5日去轉台北，同大家拉近番距離。」

增肥之旅
由於台灣所有嘢對阿東來講都好新鮮，難得朋友又肯陪佢再去，所以佢唔介意畀人笑冇新意，「有啲地方就算我之前去過，但過咗咁多年都唔同晒，好彩朋友由得我揸主義，雖然有啲厭棄，但都肯陪我再去過，真係好兄弟！我覺得最靚係淡水同野柳啲風景，當然台灣啲嘢食一定正啦！好似喺饒河夜巿食嘅藥膳排骨咁，啲湯又濃，排骨又入味，我本嚟諗住減肥，點知變咗增肥之旅，不過去得旅行放鬆，就唔諗咁多，好彩返嚟狂做運動，好快減番幾磅。」

見阿東在淡水情人橋擺晒心心甫士，他解釋此行原來另有目的，「本嚟諗住喺情人橋睇吓會唔會有艷遇，希望下次有女朋友陪，唔使再兩個麻甩佬去玩啦！點知完全冇人理我，唯有繼續專心做嘢，快啲上車買樓做業主先啦！」