離巢後獲得不少工作機會 林子博：感受到人間有情

早前被離巢的林子博今日為「生化危機驚慄體驗館」活動做主持，今次是他離巢後首個司儀工作，他直言獲得不少朋友幫忙，感受到人間有情，亦好多人找他工作，令他意想不到。

子博說：「昨日我見到大廈的業主立案法團主席，平時見他鬧人多，但估不到見到他感性一面，他給一張5位數字支票我，叫我自己寫返個名，自己無諗過。我的小孩平時好乖，落街會跟他打招呼，他睇住我一對小朋友長大，近排亦少見我太太出現，所以他好有心。」

子博直言試過行街經過店舖，遇上不認識的店鋪老闆也叫他加油，還鼓勵說低潮一定會過去，擔任演藝人協會主席的古天樂親自致電給他，問及工作情況。他說：「當年我們同期出道拍卡拉OK MV，他問我劇組有冇搵我，因為預了ViuTV劇集《地產仔》的一個角色畀我，昨日跟導演傾角色，仲畀兩個角色叫我揀，我同導演講覺得我適合邊個就做邊個角色。」

談到離巢後獲得不少工作，太太會比較安心。子博坦言太太擔心家庭收入，但感受到很多人幫忙不覺得太無助，又透露現時工作排至農曆新年，每月平均有3個活動工作，不過收入不及以前，亦要應付太太的醫療開支，希望繼續有更多工作。