林子博太太患極罕見癌病激動落淚 憂老公壓力爆煲

無綫娛樂新聞主播林子博與太太Shirley結婚16年，育有14歲女兒林詠渝與10歲兒子林卓楠，一家原本生活幸福，但Shirley於今年4月確診患上罕見的「平滑肌肉瘤（腹腔）」，發現時已有擴散跡象，更進入第四期，只能接受化療。
今期《東周刊》獨家專訪Shirley，她激動落淚說：「當知道有呢個病之後，我情緒非常之激動，而且好負面，老公喺我面前表現好正面，因為佢唔想我唔開心，但係我知道佢負擔好大，我驚佢會有一日爆煲。而家我冇返工，又要成日睇醫生，只係得佢一個人撐起頭家，見到佢成個人落晒形，我乜嘢都幫唔到手，其實我自己都好唔開心。」
Shirley續說：「醫生話呢個病一萬人先有一個，藥廠都唔會做呢啲咁少人用嘅藥啦，所以我如果要食到真正有效嘅藥，簡直天文數字，我哋冇晒希望。上次去照腫瘤嘅面積，大咗好多。我起初做化療嘅時候，二十四小時都全身痛楚，去唔到廁所，瞓唔到覺，食唔到嘢，條頸爛晒，足足捱咗七日，副作用係大到冇人相信到！」

子博今日凌晨則在fb留言：「自從公開太太患病後，近日收到有好多朋友以及本身唔相識嘅有心人，都透過唔同嘅渠道聯絡我。除咗打氣激勵嘅說話之外，有部分亦都分享咗唔少相關資訊俾我參考。感激！🙏🏻」他續謂：「好多人都話面對呢啲病，最重要係心態。其實未公開之前，一直以嚟太太都感到好無助！因為個案實屬罕見，所以基本連搵同路人傾訴嘅機會都冇！但自從報道出街之後，已經有兩位同路人（平滑肌肉瘤患者）主動聯絡我太太，分享自己嘅情況，令我太太感到不再孤單！所以喺度衷心感謝呢兩位朋友主動聯絡分享，希望你哋早日康復，身體健康！」