棟篤笑以時事作話題 林海峰借古諷今爆金句

林海峰（Jan）的《是但噏Happy Monday》棟篤笑昨晚在紅館揭幕，舞台以辦公室環境做設計，有超巨型版飲水機、影印機、又有上班一族的一雙西褲皮鞋的大腳、及搞笑的大香蕉皮，畫面有趣。除了大談打工仔心聲，緊貼時事的Jan亦以這幾個月香港發生的事做話題；更無懼媽咪、太太彭羚和兩個女兒在台下，照擺上枱暢談為自己「一家之主」的身份發聲！Jan更十八段武藝盡出的一人分飾多角似的，計扮上司、下屬、男女聲音外，更扮打乒乓球聲、滴水聲、甚至唱出日本商店歌；跳舞時又扭腰擰籮還出動一字馬，全晚笑聲不絕！

棟篤笑以講為主，Jan以不同環節與觀眾分享工作、家庭、時事，以及為人兒子、為人丈夫、為人父親的感受；當然更不乏精景金句。

初出芧蘆篇：
Jan以自己的第一份工做開場，表示十多歲時，作為待業青年得到見工的機會，立即請教一位前輩如何面試，並且憑前輩教路的一句話「Getting a job is just like getting married」求婚成功，找到人生第一份工；第二段婚姻更嫁得好好，由21歲做到現在52歲。被騙金錢是騙案，但部份打工仔係冤案，第一日返工就開始坐冤獄。

借古諷今篇：
Jan指年代不同，打工環境也不同，「以前就話『工作係恩賜、休息係放肆』，但今日變成『加班係恩賜、加薪係放肆』！今日Getting a job 唔等於getting married，你鍾意份工，份工未必鍾意，份工畀唔到幸福你，但畀到少少生活費你，所以今日搵到的大部份係『正衰工』，搞到婚姻生活不如意，現在『加人工幅度等如電車加速』，老細會話我哋講心唔講金。打工仔經常喊住話想放假，因為返工好辛苦，好似做人咁，所以放假好重要，但畀我揀，我會揀放監，因『放監唔使返去坐，放假就不過是放風』」。
Jan的其他金句還有「以前權力愈大責任愈大，現在係權力愈大隻鑊愈大」、「只係容許下面的人忍夠辭職，從來無上面的人引咎辭職」。

梁朝偉vs劉德華無間道篇：
熱愛做運動的Jan表示有日在山頂做運動時遇上梁朝偉，「偉仔話佢啱啱忙完電影工作在休息中、可以約我去滑雪，仲用煞食的眼神說『你知我幾時都得，我日日都紅假』。但我記得同一時間有則新聞，華仔（劉德華）在演唱會期間因身體不適，喊住宣佈取消，我睇到都替華仔辛苦，但同時間又好羨慕偉仔可以放假；原本我以為每個人追求的目標，唔係做華仔就係做偉仔，但發覺我兩樣都做到，星期一至五做華仔、星期六和日做偉仔，不過每個星期一（放假後返工）都要進入無間地獄的痛苦生活，沾寒沾凍咁咪就係臥底病發作，大家經常口講華仔你係我榜樣，但試問邊個想做華仔？個個都想做偉仔，尤其打風季節，仲會突然由偉仔變華仔！」

一家之主心聲篇：
Jan和太太彭羚育有兩名女兒林泳和林清，Jan以日常點滴披露為人夫和人父的辛酸！「我屋企都有兩個公主，一個19歲、一個15歲，19歲嗰個著啲裙又薄又輕又短、好似幾歲大著嗰啲咁細條，睇到我心都跳埋出來。我做過男仔我知，十幾歲啲男仔好污糟，去完小便用衫抹手、跟住就拖女仔隻手；又會食完嘢唔擦牙，成口廚餘，如果同佢咩，就等於用條脷清理海洋垃圾。但我細個見到啲裙愈短愈開心，點解現在見裙愈短愈擔心，咪就係成長；15歲嗰位都見到成長。當反叛期（兩個女）遇上更年期（自己），食飯都好大件事，兩位公主去到餐廳話要自己叫菜、要睇餐牌，無問題咪畀佢哋睇，但佢哋睇得好有型，每睇一行就向我反白眼…死喇，我個女今晚喺度！3母女睇餐牌好有心機好似睇小說（咁耐），催佢哋又被反眼，俗語話『成功男背後有個女人，失敗爸爸背後總有一兩個反白眼的仔女』，作為一家之主、一定要聆聽家人反眼的聲音。」

「常說對小孩要像朋友段溝通，我屋企都有兩朋友，仲住咗好多年，又唔交租，出入又唔打聲招呼，但當自己小孩係朋友，小孩又有無當你係朋友，定係唔想同你做朋友？或者想同動物做朋友多啲，有次兩個女話要養狗，我話搞清楚係想養狗與玩狗時，被叫『daddy shut up』！ok，唔畀我講咪喺騷度講，養好麻煩有好多責任，玩就好簡單，我就係貪玩要養兩個，但有日連太太都話要養狗，到我反眼，我知我唔及狗可愛，喺屋企又吠得大聲咗少少，我知daddy獨裁要人聽佢話，但狗就聽晒人話，而且現代文明係追求民主，所以終於養咗狗，計劃非常之成功，自從養狗後，兩個女每次返屋企一打開門就多咗好多笑聲，和諧咗好多。我仲好明白以生命影響生命這句說話，有日見太太為狗梳毛，我企後面好耐佢都唔知，跟住太太另轉面同我講話『好開心好舒服』，但我無聽過太太對住我講這6個字，正確係自從有咗小朋友後無，剩係同我講『好眼瞓』。有日仲離譜，佢抱狗入房話一齊瞓，我有諗過3個瞓，但唔係同狗，容乜易輪到我瞓籠？咁落去唔係辦法，要以其人之度還自其人之身，佢哋以狗影響我生命，有日我幫狗梳毛，佢哋返屋企見到大叫：「oh daddy！」Jan更鬼馬的扮喊說：「我聽到全屋企人叫我，係十幾年來第一次，我感覺到自己的存在。」

壞男孩篇：
Jan直認小時候很頑皮，和弟弟經常被媽咪用滕條招呼，「我媽咪好fit，仲fit（藤條）我哋fit得好有潮流品味，左邊三下、右邊三下，就變成一個運動品牌，考試唔合格仲會變漁網絲襪…阿媽今日又喺度添！我細個好百厭，有次同細佬打交，阿媽兩個都打，打到藤條都爛，唔知我還是細佬話要登報脫離母子關係，阿媽就一路話『你試下吖』一路去煮飯。但如果現在登報，我就會話『本人林海峰及細佬曉峰，感謝我阿媽以公平、公正、公開的方式處理我兩兄弟，絕無大細超，不孝子上！」

壞男人篇：
Jan為了演出舞台劇專誠學演技訓練，又自爆與黃秋生及名演員綵排，二人被讚ok，唯獨自己，有日終於得到導演連講3次ok，不過下一句是「但係呢」，明白到連講三次「ok」即係「唔ok」；終於第一次成功演出，仲得太太的肯定，就係讚其他人演得好好，給自己只一句「我瞓先」！Jan又提到舞台劇中飾演出軌男，稱導演教路只要有掙扎就不是一個壞人，觀眾就會同情；他笑稱最初人人都會掙扎，但之後就『正所謂壞咗的人寧舍精神，壞咗的人先至係人』；『工作可以改變一個人』；『正所謂絕對的權力可以令人絕對的腐化，但絕對無力係可以令人絕對睇化。』」

表演期間，唱得的Jan亦開金口，更賣力跳舞兼落一字馬，但近乎完成就連他自己都忍不住偷笑。搞笑是唱完被大呼安哥時，Jan抵死謂：「我上次睇容祖兒唱30幾首歌，我話黐線㗎，唱一首咪得囉喺紅館！」

安哥部份，上演的「公司Dinner Party」部份中，兩位表演嘉賓黃秋生扮演的黃經理、及葛民輝扮的葛主任先後登場，秋生被形容為一個表面性格火爆，人人都鬧，內裏其實有自己一套堅守做人原則、愛心澎湃、溫文爾雅的可愛小男孩；更以搞鬼搞馬的「西裝服」鬥獻技，阿葛彈Ukulele，秋生則吹口琴，吹得似模似樣的他更吹到瞓地七情上面，更搞笑是講廣東話時扮不純正，多次爆出粗口諧音。二人又與Jan暢談打公仔心聲，齊齊又講又唱又跳的合唱多首歌曲，最後合唱陳百強的《疾風》為當晚劃上歡笑和鼓勵的句號。