栋笃笑以时事作话题 林海峰借古讽今爆金句

林海峰（Jan）的《是但噏Happy Monday》栋笃笑昨晚在红馆揭幕，舞台以办公室环境做设计，有超巨型版饮水机、影印机、又有上班一族的一双西裤皮鞋的大脚、及搞笑的大香蕉皮，画面有趣。除了大谈打工仔心声，紧贴时事的Jan亦以这几个月香港发生的事做话题；更无惧妈咪、太太彭羚和两个女儿在台下，照摆上枱畅谈为自己「一家之主」的身份发声！Jan更十八段武艺尽出的一人分饰多角似的，计扮上司、下属、男女声音外，更扮打乒乓球声、滴水声、甚至唱出日本商店歌；跳舞时又扭腰拧箩还出动一字马，全晚笑声不绝！

栋笃笑以讲为主，Jan以不同环节与观众分享工作、家庭、时事，以及为人儿子、为人丈夫、为人父亲的感受；当然更不乏精景金句。

初出芧芦篇：
Jan以自己的第一份工做开场，表示十多岁时，作为待业青年得到见工的机会，立即请教一位前辈如何面试，并且凭前辈教路的一句话「Getting a job is just like getting married」求婚成功，找到人生第一份工；第二段婚姻更嫁得好好，由21岁做到现在52岁。被骗金钱是骗案，但部份打工仔系冤案，第一日返工就开始坐冤狱。

借古讽今篇：
Jan指年代不同，打工环境也不同，「以前就话『工作系恩赐、休息系放肆』，但今日变成『加班系恩赐、加薪系放肆』！今日Getting a job 唔等于getting married，你锺意份工，份工未必锺意，份工畀唔到幸福你，但畀到少少生活费你，所以今日搵到的大部份系『正衰工』，搞到婚姻生活不如意，现在『加人工幅度等如电车加速』，老细会话我哋讲心唔讲金。打工仔经常喊住话想放假，因为返工好辛苦，好似做人咁，所以放假好重要，但畀我拣，我会拣放监，因『放监唔使返去坐，放假就不过是放风』」。
Jan的其他金句还有「以前权力愈大责任愈大，现在系权力愈大只镬愈大」、「只系容许下面的人忍够辞职，从来无上面的人引咎辞职」。

梁朝伟vs刘德华无间道篇：
热爱做运动的Jan表示有日在山顶做运动时遇上梁朝伟，「伟仔话佢啱啱忙完电影工作在休息中、可以约我去滑雪，仲用煞食的眼神说『你知我几时都得，我日日都红假』。但我记得同一时间有则新闻，华仔（刘德华）在演唱会期间因身体不适，喊住宣布取消，我睇到都替华仔辛苦，但同时间又好羡慕伟仔可以放假；原本我以为每个人追求的目标，唔系做华仔就系做伟仔，但发觉我两样都做到，星期一至五做华仔、星期六和日做伟仔，不过每个星期一（放假后返工）都要进入无间地狱的痛苦生活，沾寒沾冻咁咪就系卧底病发作，大家经常口讲华仔你系我榜样，但试问边个想做华仔？个个都想做伟仔，尤其打风季节，仲会突然由伟仔变华仔！」

一家之主心声篇：
Jan和太太彭羚育有两名女儿林泳和林清，Jan以日常点滴披露为人夫和人父的辛酸！「我屋企都有两个公主，一个19岁、一个15岁，19岁嗰个著啲裙又薄又轻又短、好似几岁大著嗰啲咁细条，睇到我心都跳埋出来。我做过男仔我知，十几岁啲男仔好污糟，去完小便用衫抹手、跟住就拖女仔只手；又会食完嘢唔擦牙，成口厨馀，如果同佢咩，就等于用条脷清理海洋垃圾。但我细个见到啲裙愈短愈开心，点解现在见裙愈短愈担心，咪就系成长；15岁嗰位都见到成长。当反叛期（两个女）遇上更年期（自己），食饭都好大件事，两位公主去到餐厅话要自己叫菜、要睇餐牌，无问题咪畀佢哋睇，但佢哋睇得好有型，每睇一行就向我反白眼…死喇，我个女今晚喺度！3母女睇餐牌好有心机好似睇小说（咁耐），催佢哋又被反眼，俗语话『成功男背后有个女人，失败爸爸背后总有一两个反白眼的仔女』，作为一家之主、一定要聆听家人反眼的声音。」

「常说对小孩要像朋友段沟通，我屋企都有两朋友，仲住咗好多年，又唔交租，出入又唔打声招呼，但当自己小孩系朋友，小孩又有无当你系朋友，定系唔想同你做朋友？或者想同动物做朋友多啲，有次两个女话要养狗，我话搞清楚系想养狗与玩狗时，被叫『daddy shut up』！ok，唔畀我讲咪喺骚度讲，养好麻烦有好多责任，玩就好简单，我就系贪玩要养两个，但有日连太太都话要养狗，到我反眼，我知我唔及狗可爱，喺屋企又吠得大声咗少少，我知daddy独裁要人听佢话，但狗就听晒人话，而且现代文明系追求民主，所以终于养咗狗，计划非常之成功，自从养狗后，两个女每次返屋企一打开门就多咗好多笑声，和谐咗好多。我仲好明白以生命影响生命这句说话，有日见太太为狗梳毛，我企后面好耐佢都唔知，跟住太太另转面同我讲话『好开心好舒服』，但我无听过太太对住我讲这6个字，正确系自从有咗小朋友后无，剩系同我讲『好眼瞓』。有日仲离谱，佢抱狗入房话一齐瞓，我有谂过3个瞓，但唔系同狗，容乜易轮到我瞓笼？咁落去唔系办法，要以其人之度还自其人之身，佢哋以狗影响我生命，有日我帮狗梳毛，佢哋返屋企见到大叫：「oh daddy！」Jan更鬼马的扮喊说：「我听到全屋企人叫我，系十几年来第一次，我感觉到自己的存在。」

坏男孩篇：
Jan直认小时候很顽皮，和弟弟经常被妈咪用滕条招呼，「我妈咪好fit，仲fit（藤条）我哋fit得好有潮流品味，左边三下、右边三下，就变成一个运动品牌，考试唔合格仲会变渔网丝袜…阿妈今日又喺度添！我细个好百厌，有次同细佬打交，阿妈两个都打，打到藤条都烂，唔知我还是细佬话要登报脱离母子关系，阿妈就一路话『你试下吖』一路去煮饭。但如果现在登报，我就会话『本人林海峰及细佬晓峰，感谢我阿妈以公平、公正、公开的方式处理我两兄弟，绝无大细超，不孝子上！」

坏男人篇：
Jan为了演出舞台剧专诚学演技训练，又自爆与黄秋生及名演员彩排，二人被赞ok，唯独自己，有日终于得到导演连讲3次ok，不过下一句是「但系呢」，明白到连讲三次「ok」即系「唔ok」；终于第一次成功演出，仲得太太的肯定，就系赞其他人演得好好，给自己只一句「我瞓先」！Jan又提到舞台剧中饰演出轨男，称导演教路只要有挣扎就不是一个坏人，观众就会同情；他笑称最初人人都会挣扎，但之后就『正所谓坏咗的人宁舍精神，坏咗的人先至系人』；『工作可以改变一个人』；『正所谓绝对的权力可以令人绝对的腐化，但绝对无力系可以令人绝对睇化。』」

表演期间，唱得的Jan亦开金口，更卖力跳舞兼落一字马，但近乎完成就连他自己都忍不住偷笑。搞笑是唱完被大呼安哥时，Jan抵死谓：「我上次睇容祖儿唱30几首歌，我话黐线㗎，唱一首咪得罗喺红馆！」

安哥部份，上演的「公司Dinner Party」部份中，两位表演嘉宾黄秋生扮演的黄经理、及葛民辉扮的葛主任先后登场，秋生被形容为一个表面性格火爆，人人都闹，内里其实有自己一套坚守做人原则、爱心澎湃、温文尔雅的可爱小男孩；更以搞鬼搞马的「西装服」斗献技，阿葛弹Ukulele，秋生则吹口琴，吹得似模似样的他更吹到瞓地七情上面，更搞笑是讲广东话时扮不纯正，多次爆出粗口谐音。二人又与Jan畅谈打公仔心声，齐齐又讲又唱又跳的合唱多首歌曲，最后合唱陈百强的《疾风》为当晚划上欢笑和鼓励的句号。