【維港會】總商會總裁袁莎妮將離任 望多啲時間陪王維基

香港總商會總裁袁莎妮(Shirley)有新動向，佢話為咗王維基放棄做女強人咁話！Shirley去年同王維基結婚，佢話當時老公已有指令，今年底必定要交人，加上已在總商會任職8年，都差不多是時候起身，所以才呈辭。佢3個月前遞咗離職申請，由於合約規定通知期係6個月，所以佢會視乎總商會搵接任人嘅進度，先定到幾時離任。由於一早諗住離開商界，所以今次離職並非外界傳言，因修例風波言論而被逼引退。

Shirley甜絲絲咁話，希望離開工作崗位後同王先生多啲去旅行，過吓二人世界嘅日子，原來佢喺7月自己同老公兩家人先去咗歐洲玩咗3個星期，被問是否好sweet，佢話多數時間一班親人一齊，只係最後幾日先有2人世界喎，咁佢正式離任後就可以多啲陪老公啦。至於未來去向，佢話休息完慢慢諗，真係愛情大過天。