獲小齊醫治心病 鄭秀文同華仔拗愛情親情觀

鄭秀文（Sammi）主演電影《花椒之味》外，她主唱的電影主題曲《好好說》MV亦正式曝光，拍攝期間回看電影裏與賴雅妍和李曉峰的姊妹情節，還有好友劉華和任賢齊重磅彩蛋，Sammi都百般滋味！
華仔與小齊到來客串，一個是Sammi的老拍檔、一個是舊情人。小齊與Sammi合作《嫁個有錢人》後相隔16年再結片緣，Sammi說：「小齊永遠都係咁親切，一見到佢心裏就好溫暖。」小齊戲中飾演暖男醫生，受命去醫治她的心病。至於「舊情人」就是指與Sammi演過無數次情侶夫妻的華仔，她說：「華仔雖然只係客串咗幾場戲，主要講愛情和親情嘅議題，原來男人真係嚟自火星，女人嚟自水星。就算大家講緊同一個話題，但去到某啲位又講唔到落去。當大家正面對如何經營一段男女關係嘅時候，一定好有同感和會心微笑。」

至於與賴雅妍和李曉峰首次合作，「三個女人一個墟」一拍即合，Sammi說：「劇本好多笑中有淚，我同兩個妹妹建立咗真摯感情，好唔捨得。所以電影煞科時我心情極之複雜，一方面好開心，終於完成一部電影，但另一方面對於角色好唔捨得。當我進入咗呢個角色的時候，佢哋笑、佢嘅經歷或者眼淚，所有情緒都係真，好似將空間定格咗喺畫面，雖然第一次合作，過程好多事值得回憶。」
戲中3姊妹同父異母，在爸爸的喪禮上第一次相遇，加上要共同解決問題，感情迅速建立。鏡頭後她們一見如故，很快投入角色，比戲中姊妹更情深，甚至同笑同淚神同步。Sammi說：「戲中好多搞笑情節難忘，但感情重頭戲拍攝時，互相畀力量大家去演出，眼淚互相感染對方，當大家拋出真感情出嚟嘅時候，情節就會好好睇，呈現到角色有血大肉嘅地方。」