爆Sammi曾盛裝探BB 謝安琪感動：佢台上台下傾偈都係咁真摯

天后鄭秀文（Sammi）越唱越起勁，昨晚（16號）「＃FollowMi 世界巡迴演唱會 香港站」第5場演出，全場勁High，觀眾席的蔡一智與囡囡、Twins的蔡卓妍和鍾欣潼、周慧敏、倪震、薛家燕、鄧萃雯、余安安、張繼聰、余德丞和蔡思貝等，當Sammi唱《信者得愛》時都企起身一齊高唱「High High High」。而「最索人妻」謝安琪擔任昨晚表演嘉賓，台上大爆Sammi盛裝探BB，令她受寵若驚！

今次是Sammi第10次紅館個人演唱會，她特別加入藝術表演，讓觀眾感受不一樣的演唱會，就連表演嘉賓也令人意想不到。昨晚當謝安琪（Kay）從升降台出場和她合唱《默契》時，Sammi以「最索人妻」介紹出場，觀眾驚喜嘩然。Kay攬實Sammi纖腰，說：「好正呀，雖然成日睇你演唱會，但未試過咁近，可以攬住，好正呀！」Sammi表示大家都好奇她與Kay的關係，其實他們私下是好朋友。Kay對Sammi說：「你真係好好……」Sammi說：「有幾好？讚嘅說話唔怕講喎！」Kay續說：「我份人好怕醜，唔係好主動嘅人，你第一次同我講祝福說話又為我禱告，嚇死我，我真係受寵若驚。同埋你好真心，台上台下私下傾偈都係咁真摯、咁用心……我想喊！」然後攬實Sammi，再說：「喺我生完BB嘅時候，有一日你突然話嚟探我……」Sammi說：「同埋馮太一齊，馮德倫太太……（雷太，雷頌德太太）馮德倫太太係舒淇，係喎，哈哈哈！」連Sammi自己都不禁大笑起來。

Kay續說：「我心諗點解你個人咁好？好到晏晝嚟我屋企，仲要著到鬼火咁靚喎！（係呀，我落街倒垃圾都係咁！）你嗰日著到成身紅卜卜……（一定搽紅唇膏，我平時喺屋企都搽紅唇膏。）你突然嚟我屋企又搽晒紅唇，好隆重，我受寵若驚，我全家人都好緊張，所以印象好深刻。」Sammi笑說：「你奶奶好熱情，我哋傾咗好耐，其實我想扯架啦，佢幾乎想請我食埋消夜！」

Sammi笑指想請年紀比她大的女歌手做嘉賓實在不容易，所以都請來年紀比她小，加上她很喜歡與新人合作，說：「喺新歌手身上我學到好多嘢，我都鍾意同新樂手、樂隊、Rapper合作，佢哋帶畀我新靈感。」之後Sammi準備落台，她請Kay唱《囍帖街》但Kay想合唱，Sammi說：「唔得，唱埋我換唔切衫啦！」然後一邊落台一邊與Kay互講「I Love You」，好鬼冤氣！