【維港會】愛車被鎖苦纏職員求放行 大媽：我企喺度都鎖！你蝦人！

沙田第一城屋苑內有「鎖車隊」，因出名鎖車速度極快，被網民戲稱為「F1鎖車隊」。網上日前瘋傳一段影片，有穿著拖鞋的大媽停泊一分鐘即被鎖車，她拉著職員苦苦哀求，希望獲放行，軟硬兼施下被對方拒絕，氣憤斥「我企喺度都鎖！你蝦人！」。

有網民在社交網站Facebook群組「馬路的事討論區」上載影片，由片中可見，一名穿著拖鞋、粉紅色連身長裙的大媽，一手夾著快遞包裹，一手扯著鎖車隊職員的衣袖，以不純正的廣東話求情：「你咁樣鎖就唔啱啦嘛，係唔係呀？你話長時間都話，一分鐘你都鎖！」、「你未鎖嗰時，我已經落咗嚟喇，你都要畀一、兩分鐘時間人哋走架，係唔係呀？完全一分鐘都唔畀，你係唔係過分得濟呀？」。

期間被扯衣袖的職員試圖掙脫大媽但不果，他無奈多次表明：「件衫爛喇...」，但大媽未有理會，繼續糾纏「一分鐘你都鎖，通融吓啦」、「你幫我開返鎖先！」，職員就表示：「鎖咗就開唔到，你去保安部嗰邊講啦！你抆爛我件衫都冇用！」大媽嬲爆回道：「爛我咪賠返畀你囉！」、「你依家過分得濟呀...你蝦人！你蝦人！你蝦人！」

影片引起網民熱論，不少人斥責大媽說法是歪理，「養得起車都唔差在幾舊水喇！發爛渣都冇用㗎！阿叔冇匙开鎖㗎」、「 有錢揸車無錢泊車，仲大條歪理！鎖埋你個嘴呀！」，亦有網民食花生留言笑稱「香港鎖車第一城都唔識？」、「鎖車第一城呀！大媽，下次學醒啲啦！」。