【維港會】狂呻餐廳食物比40年前貴 伙計KO老熟客：你層樓夠唔係咁嘅價啦

老一輩不時會想當年，有餐廳員工就分享一名自稱是老熟客的小故事，指對方買外賣後抱怨「好貴呀，以前食唔係咁架」。另一員工初時耐心地解釋，加價是因成本上漲，但強調只是某幾款食物加了2、3元，詎料婆婆隨即反駁：「咩幾蚊呀！係貴咗好多呀！40年前你哋好平架！你都未出世呀！」婆婆不斷狂呻，店員終忍不住大聲說：「阿婆！你揸住嗰層樓40年前夠唔係咁嘅價啦！你用40年前個價賣你層樓畀我，今餐我用40年前個價賣畀你囉！」餐廳客人聞言都不禁發笑。

該餐廳員工「小薯」在facebook專頁「西客之道 Hispitality Secret」投稿，指餐廳經營了逾半世紀，自己則在該餐廳工作近10年，不時遇到很多恃熟賣熟，或者聲稱自己光顧了很多年的客人。一名婆婆早前買外賣，得知價錢後，就非常大聲地罵「有無搞錯呀？好貴呀！貴過我之前食好多呀！」

落單員工則笑笑口答道：「生意難做呀，有時成本問題，真係無辦法架」，並指上一次加價已是接受一年前，而且當時「都係某幾樣嘢起咗兩三蚊架咋」。婆婆聞言反擊：「咩呀！咩兩三蚊呀！我同你講呀！我由60年代就開始食你哋！你識咩呀！我食咗40幾年架！你哋40幾年前唔係咁嘅價架！咩幾蚊呀！係貴咗好多呀！40年前你哋好平架！你都未出世呀！」

員工初時都不再理會，但見婆婆仍一邊等外賣，一邊大聲地罵，「內容重覆又重覆，不斷重申比40幾年前貴，全餐廳都望住佢。」員工隨後終於忍無可忍，大聲地說：「阿婆！你揸住嗰層樓40年前夠唔係咁嘅價啦！你用40年前個價賣你層樓畀我，今餐我用40年前個價賣畀你囉！」婆婆聞言鴉雀無聲，但其他食客則傳來笑聲。

帖文在網上掀起熱議，不少網民都大讚餐廳員工是「完美KO」、「依個世界有通脹」、「如果佢真係肯用40年前嘅價賣樓，我請足佢一年外賣」。不過，有網民也懷疑婆婆或患上腦退化，才對早年記憶特別有印象，另有人認為「婆婆無正常收入，分分鐘只有份生果金生活。又可能佢想搵人傾吓計呢，老人家係咁㗎喇，耐心啦！」