對住女仔勁細膽 徐浩昌:我係勁淆底嘅垃圾嚟！

原創本土劇《向西聞記》自從在 NETFLIX 及 hmvod 上架後，至今網上總點擊已高達 200萬，成績驕人。

當中單元《因為寂寞所以健身》，涉及累到人雞毛鴨血的倫敦金及健身會籍問題，飾演 IT 狗的徐浩昌 ( 肥腸 ) 因偷戀靚女黎紀君 ( Christy ) 而健身操 fit，希望變大隻佬贏得青睞，但事與願違，反變水魚被健身院騙錢，最後更連環中伏。

肥腸直認對住甜美可人的 Christy 拍戲有「心跳」加速，「我由拍完套戲，到煞科飯、慶功宴、首播禮所有活動，加埋同佢講唔夠十句嘢，我係對住女仔嗰啲勁細膽勁淆底嘅垃圾嚟架。」反而 Christy 就不會對肥仔卻步：「可能我係人馬座，好多嘢憑感覺，肥腸喺戲入面為追阿純 ( 其飾演角色 ) 特登去做健身改變自己，呢樣嘢我係幾欣賞。如果真係有個男仔為咗追我而好努力去改變一樣佢好難改變嘅嘢，係會好吸引到我，希望我可以快啲搵到呢個人啦。」

提到現今社會騙案曾出不窮，投資、股票、健身院、美容院等，都令不少人誤墜陷阱，Christy 表示曾收過自稱入境處人員來電，幸獲媽媽提醒未有中招，「嗰個人話係入境處，話我嘅身份證明文件被人盜用，要我俾錢去辦領，當時我好驚，半信半疑，好彩媽咪喺隔離聽到就叫我收線，話好明顯係呃人電話，自此之後我都小心。」