對李佳芯一見鍾情 楊天宇狂獻恩勤被炒

英皇新人楊天宇（Angus）與無線「視后」李佳芯（Ali）拍攝微電影廣告，名為《可能一直都在》。廣告分上下兩集，Angus在當中飾演職場新人，第一日返工就對上司Ali一見鍾情，並積極展開追求攻勢，之後他為了幫Ali補鑊仲被炒魷魚，認真大犠牲！

微電影中，Angus對上司Ali相當主動，但鏡頭後則是怕醜仔一名。難得有機會親近女神，Angus當然把握機會集郵，但拍攝無數張合照後，Angus都不滿意：「唔得呀。」再影多次之後，Ali睇到相後即講笑說：「原來係你影極都唔靚。」搞到Angus不但紅都面晒，耳仔仲爆紅！

Angus表示，Ali絕對是他心目中的女神，「第一次同Ali合作，整個拍攝過程都好開心、順利，佢當然亦係所有男性心目中嘅女神啦。至於耳仔紅，係因為被佢篤爆咗我影極都唔靚，哈哈。」