貼餵母乳照惹走光疑雲 張嘉兒：遮晒唔使擔心

港姐張嘉兒與老公婚後育先誕下大女Leora，至上周二（7日）細女Hannah出世，一家四口幸福滿瀉。目前坐月調理身體的嘉兒凌晨在社交平台分享了埋身餵母乳的照片，相中見她也十分精神，但有網民就留言表示擔心嘉兒走光，提醒她「遮唔晒」，嘉兒則回覆：「遮晒，唔使擔心，我check過好多次。」

嘉兒也在帖文表示：「第二次做媽咪果然每樣嘢都容易得多，好快已經上咗奶，然後BB已經增磅。佢瞓又瞓得越嚟越好，食又食得越來越多，好順利好開心呀！」

她又認為最難得是大女和細女相處越來越融洽，Leora亦願意做「小幫手」照顧妹妹：「我都慢慢掌握咗佢哋兩個嘅時間表，今晚呢個時候，佢哋已經瞓緊覺，我就睇《婚姻合夥人》。大家可以留意吓，有我份㗎！拍嘅時候，我記得啱啱生完大女四個月，成日要喺公司泵奶。估唔到而家播出嚟嘅時候，我就喺屋企餵完奶。」