金管局宣傳德政 風趣短片幽一默

金融管理局在本港肩負起中央銀行、銀行監管及推動金融市場發展的重任，更負責管理香港龐大外匯儲備，所以香港外儲賺多賺少食粥食飯都係睇佢。不過，金管局一向畀人硬幫幫形象，所以實際上做咗乜、日常運作係點，好多人都不太了解，但其實金管局好多工作同市民日常生活息息相關，好似印製港幣、回收硬幣車，以至近年好流行嘅跨銀行過帳的轉數快，都係金管局德政。金管局最近就諗咗條新橋，用輕鬆手法拍短片介紹局方工作。盧駿睇過條片拍得幾風趣，尤其係講金管局新人，買外賣唔記得袋錢，又唔識用轉數快過數，被外賣仔取笑的一段，真係拍得幾有趣。

據了解，今次金管局管理層都好積極參與製作過程，由創作意念至後期毛片檢視，都親力親為。劇集更係金管局首次以連續劇形式介紹本身的工作，將外界一般認為是嚴肅、神秘的工作，以輕鬆幽默、節奏明快，兼略帶戲劇化的包裝手法帶出，從而加強劇集的可觀及追看性，而且仲係金管局有史以來最多職員參與拍攝的宣傳教育片，其中六位同事更接受挑戰拍攝解說片段。金管局識得利用風趣手法推廣服務，宣傳效果絕對好過有些只懂空喊服務市民口號嘅部門！

盧駿
維港片