馬會創先河投注站開茶餐廳 馬迷邊觀賽邊歎美食隨時落注

好多馬迷去馬會投注站買馬仔，都會去附近茶餐廳飲吓奶茶、食個包，如果投注站裏面有埋茶餐廳就好囉。呢個夢想終於成真啦，馬會大搞新意思，首創在北角電氣道投注站樓上開茶餐廳，馬迷可以一面睇住賽事同賠率，一面享受美食，然後去櫃枱或投注機落注。馬會咁有心思，抵畀個Like。　

北角電氣道投注站內的茶餐廳，名叫「永勝冰室」（英文為Wins Cafe），夠晒好意頭。盧駿投注完想入去食lunch，百幾個位已經滿咗九成，好辛苦搵到個位，見到裝修新淨不在話下，仲裝咗多個屏幕，可以睇住賽馬直播及足球賽事同賠率。投注櫃枱就在旁邊，又有投注機，極之方便。

食食吓嘢，盧駿仲見到馬會主席陳南祿同零售及電話投注主管Grace嚟巡視。Grace話呢個地方原先是辦公室，馬會見馬迷有需要，就地盡其用，開咗呢間冰室，係投注站內開嘅第一間餐廳，裝修都花咗好多心機，開張只大半個月，已好受馬迷同街坊歡迎。

盧駿同朋友試咗茶餐廳嘅黑松露炒蛋菠蘿包、肉燥茄子豬扒飯、西多士同紅豆冰，都好唔錯。原來負責營運的Studio City，經營多家餐廳，好有經驗，難怪水準咁高。

盧駿
維港會