補償螞蟻孖展戶證券行送小米股 大聖證券：只賺良心錢

做生意，最緊要夠靈活，懂得變通，並為人客着想。好似今次螞蟻上市臨門一腳「撻Q」，世紀新股變為世紀驚嚇，不少借重孖展散戶白費心機之餘亦蝕利息，當然嬲嬲豬！不過，大聖證券就靈活趁機推出措施「失螞蟻，得小米」，既可補償客戶損失，又可推廣形象及業務，而且所送出小米股份潛力優厚，隨時幫客戶在小米股價上再賺多筆。

螞蟻上市失敗惹得「一身蟻」，不少人估計未來就算能再上市，估值必然「水瓜打狗，唔見一截」，但未來估值還是日後的事，好多散戶眼前就平白唔見一筆，若以孖展息率三厘計算，借一千萬元入飛，就損失過四千元，即係唔見咗一手螞蟻（螞蟻一手入場費約四千元）。大聖證券今次好貼心，推出一個叫「失螞蟻，得小米」的計畫，彌補客戶損失。呢個計畫名稱識玩諧音，已先勝一仗。咁個計畫又係點？

據大聖證券計畫，證券行會與客戶共同承擔這次特別事件帶來的費用損失，所有用孖展融資申購之客戶，大聖會按照各客戶申購之股數，以該行所定之比例，向客戶饋贈相應的小米集團股票，以部分甚至全部覆蓋客戶因申購所產生費用之損失。獲饋贈的股票將會於十一月六日連同第二次退款，一同存入客戶戶口。大聖證券表示，只會賺良心錢，實行跟客戶風雨同路。

大聖證券今次向客戶贈小米股票，直情係高招，因為除咗彌補客戶損失外，小米仲有好好升值潛力，昨日在新經濟股受壓下，仍能上升百分之七點八，收報二十三點九五元，足見實力。收到小米股票的客戶，隨時可在小米身上賺番筆，彌補錯失螞蟻的損失，正是「失之東隅，收之桑榆」！

維港會
盧駿