阿碌開咪｜家有家規着有着法

間中有朋友約去不同會所午晚餐，通常我都會先問問——有冇Dress Code，免尷尬。

因為試過幾次，難為了主人家。

第一次，馬會董事請到沙田睇跑馬。我懵盛盛，未去過，以為老西一度已掂，冇打呔。

結果一坐低，經理已埋耳邊細細聲講：「曾先生，公司有電話搵你，請到外邊聽聽！」

吓？首先，邊個會知我在馬場？第二，咁樣搵法，肯定嚴重到死人冧樓先會噃，真係嚇到彈起！

當然，同枱其他賓客，也以好奇眼光睥住，唯獨主人家微微笑，似乎唔多着緊。

結果一步出餐廳，經理已蓮子蓉咁面口，遞上六條舊領帶，又係細細聲：「曾先生，唔好意思，大董房規矩，賓客要打呔㗎，請你選一條。」

老老套套都冇法嘞，求求其其索一條啦。

又有一次，去山光道馬會會所酒吧Happy Hour，坐低，再中！經理笑笑口，攞對皮鞋埋嚟：「曾先生，呢處規矩唔可以着波鞋。呢對皮鞋一定Fit你，介唔介意穿上呢？」

一睇，肯定係人都Fit啦，成隻龍船咁大，乜野Size腳隊入去都肯定可以！好，又着，唔通起身鬆人咁冇卡士咩？過癮，對鞋乃歐洲名牌貨，着得非常舒服，幾乎唔想除，着埋走人（講笑咋）！

前日下午，某位老友又請去香港會Garden Lounge午餐。小弟早早知道，此處規矩多多，例如唔准寫野、唔准聽電話。衣着方面，唔准波鞋、牛仔褲及冇領衫。

好好好，加有家規，着有着法，來得就要尊重人哋遊戲規則。

不過，今次踏入，又中招！一位白色禮服經理閃身埋來，細細聲在我耳邊講：「曾先生，唔介意嘅話，請將恤衫腳揳返入條褲之內！」

哦……本來想駁佢話：「經理，呢件唔係純恤衫，也可以當外套着。今次小弟着法，內有圓領T恤，故此，外邊呢件係薄褸嚟㗎！」

不過，今次真係「話到口中留全句」，無謂難為主人家。大丈夫，揳就揳啦！

曾智華

 

阿碌開咪