青談｜揀芬佬當如揀老公

閨密訴苦，感情上遇人不淑，就算結咗婚還可以斬纜，正所謂分手要狠，對人仁慈就係對自己殘忍，一世人，姑息養奸，後患無窮。然而真正人間慘事，原來係揀錯芬佬買錯貨，雖未至血本無歸，惟水瓜打狗嫁妝唔見一大截，婆仔辛苦儲埋姑婆本，一心想抗通脹兼增值，為晚年未雨綢繆，血汗錢投得其所，誰知今年所投資基金埋單大部分輸突，閒閒哋十蚊唔見咗六蚊，元氣大傷，基金經理連半句Sorry都欠奉，賴加息賴收水賴通脹賴打仗，總之賴屎賴屁賴地硬，真係好賴皮。

十分同情這位閨密的遭遇，平時見專家發表意見頭頭是道，信眾又多，把私己付託增值，反更損手。身邊亦有一位長居海外的作曲家，已屆花甲，卻因負責其戶口的RM十分體貼以客為尊，日子有功，成功為其財富連年增值，早已優哉游哉。

閨密靜思己過，檢討投資失利原因，歸咎假手於人之前未有做好DD（Due Diligence），即盡職審查。筆者嘗試用揀老公的條件，應用於揀芬佬/芬婆，關乎自己私己錢福祉，比揀老公更須小心翼翼，股品好車品好牌品好家品好，人品也不會差到哪裡！

筆者嘗試用消元法（By Elimination Method），剔除凡擁有以下元素者，希望有助閨密改善戰績。

一、賭性太強：小注怡情，大賭亂性，波馬金銀銅鐵股輪債麻將十項全能唔賭唔舒服的病態賭徒，避之則吉。

二、冇口德：男人老九，從來把寶貴時間盤算怎樣可以成為一個更好的自己，提升個人優勢，卻終日東家長西家短兼毒舌，踩人自己就可以上位，結果適得其反，神憎鬼厭。

三、妒忌心重、城府極深、同行相輕者。

四、認屎認屁唔認輸、輸打贏要扮懵扮失憶之人。　

五、自以為是者。

六、食古不化之人。

七、IQ高EQ低者。

八、歪理扮道理者。

九、歧視女性者。

胡孟青

 

青談