阿碌開咪|白宮發言人新突破

2022-08-06 11:25
過去一星期,好多人話睇新聞,睇到手心冒汗,因見到佩洛西硬闖台灣,但又唔知北京會點出招,戰事可能一觸即發。

然後,佩嬸走後,解放軍又圍住台灣實彈軍演,一切一切,真係見所未見,驚恐,乃正常反應。

我又如何?心跳並冇加速,只默默冷冷睇睇兩個大國點出招。總之,煮到埋嚟就食,自己又話唔到事,完全無參與權(但有分析權!)。傳媒人訓練,當一場刺激球賽去「欣賞」好了。

睇電視新聞,小弟其中一項尤其喜歡的,為觀察中美兩國外交發言人的「表演」。

美國的,叫白宮新聞秘書(White House Press Secretary)或白宮發言人,代表美國政府及美國總統向外發言,即場回應記者提問,少點功力也會在全世界面前出醜。

因地位重要,非等閒之輩可「扮野」。故此,在梁振英任特首時,其新聞統籌專員自比「白宮發言人」,立即搞到全港資深新聞人笑甩牙,紛紛背後話想送塊鏡畀佢照一照。

其實,歷屆白宮發言人也不是個個醒目精靈、有型有款。例如近日頻頻出鏡的柯比,就成個上世紀七十年代阿叔咁,老老套套,見到佢都想打呵欠。

不過,另一位皮埃爾則完全不同,簡直令人眼前一亮!

最犀利係佢背景,不但是首位非裔白宮發言人,更破格,乃公開承認是同性戀、雙性戀及跨性別者。如此身分能擔起白宮發言人位置,真的令人有少少O嘴。

這個,就要畀掌聲拜登喇,因佢一力推薦皮埃爾,指佢具備出任發言人的經驗、才能與正直性格。

有冇過譽?簡單,大家睇睇佢呢幾日面對毫不留情的白宮記者提問,如何反應,就知呢位「黑珍珠」段數幾高。佢贏在開朗活潑,經常面帶笑容,毫不緊張。最重要——熟書!完全掌握記者的「炮火」何在,故能一一拆解,具欣賞價值!

 

曾智華

阿碌開咪

關鍵字

最新回應

關鍵字

熱門文章