阿碌開咪｜肥波瓜硬

（執筆寫此稿時，肥波仍堅拒辭職！之後，形勢比人強，終於認衰下台。）　

「肥波」係邊個？個名好親切吓噃！係，正是英國首相約翰遜！佢本來「賣」親切，由倫敦市長開始，呢個肥嘟嘟的政治人物，憑着一頭亂髮，踩單車返工，同市民攬頭攬頸講笑，得到大部分民心，一帆風順打低前首相文翠珊，二○一七年登上首相大位。

可惜，做市長與做首相，根本是兩碼子的層次。肥波的嘻嘻哈哈作風，很快便被看厭。繼而被政敵開展一浪又一浪狂攻（英美政壇皆如此，根本是猛獸森林，敵對者用盡一切手段拉你下台，奪權大過天）。

本來敵人狂攻，若你冇乜位畀佢哋入，也難以咬死你。最弊係肥波自製死穴，對手見有「血水」流出，唔狂噬就奇。

歐美政客，你話真又好，做戲又好，最重視誠信（Honesty），講一次大話，已是死罪。

不過，現實中，邊個可以唔講大話？佢哋慣性口吻為：Speaking Half Truth。強如美國前總統克林頓，大家都知佢謊話連篇，不過，當時民望如日方中，加上黨友力撐，才可捱過「雪茄醜聞」。

英國首相肥波又如何？點解好似兵敗如山倒？無他，因除天然死敵工黨外，自己保守黨內本來的同路人，也睇得出佢時日無多，故紛紛調轉槍頭逼宮。因唯有如此，保守黨才有機會頂到二○二五年大選。否則，一定成個黨死在肥波手上。

其實，假若肥波有少少羞恥之心，在被揭穿向國會講大話（派對門事件）及兩場國會議席補選失敗後，就應第一時間主動請辭，保留返少少（丁點）被尊重的可能。

可惜，一子錯，仍厚着面皮話可以領導保守黨再次贏得大選。

終於，你唔走，成個內閣成員紛紛跳船雞飛狗走，變相自己友逼宮，睇你點死？

事到如今，七成以上民意叫你滾蛋，灰頭土臉，已失最有尊嚴下台時機。

點解做到咁高位都會如此不智（蠢！）㗎？

曾智華

阿碌開咪