阿碌開咪｜住就可買，投資咪搞

坦白招認，我從來不是甚麼投資明燈。不過，近幾年真係日日有生張熟李在任何場合問：「碌Sir，應唔應該買乜乜乜？物物物？」

當中有外幣、黃金、股票、車位、的士牌……最多係問買樓！香港人真是特別鍾情「磚頭」。

昨日又有一位「世侄P」，就快結婚，問我應否買樓？因佢同女友過去兩年月付二萬元租樓，近來樓價明顯回落，但又不知跌幾多，故此個心十五十六。

喂，老老實實，呢類一生重大投資，任何成年人皆應該自行決定嘛，因為其他人完全唔知你要求，亂畀意見，十九唔會中兼盞搞啦。

不過，為免佢失望，一於「李嘉誠」上身：「嗱，世侄，若果你睇啱一個喜歡單位，自住，又肯定供得起者，就可以考慮買。因為優質單位而又合眼緣的，非常罕有㗎。就算差幾十萬元，若住得安心舒服，絕對值。倒轉，千祈咪貪平，買個又陰暗、又三尖八角兼住客質素差嘅單位啊。」

係咪講咗等於冇講呢？

「世侄P」頷首，諗咗三秒，又問：「其實我同老婆仲可以供多個細單位作投資，又好唔好呢？」

吓，乜原來佢咁富有？咁問我把鬼咩！

不過，都要真誠畀答案應酬下佢：「世侄，自住同投資放租兩回事！自住單位，應似藝術品，價錢可以貴啲，但日日對住，一定要令自己心境平和快樂。投資，完全唔同，必須考慮有冇升值能力、甩唔甩到手，以免執條襪帶累身家！」

小弟看法，如今買樓投資，絕非智者所為。原因簡單：一、大量提供居住單位，解決居住問題，乃中央指定下任特首要做的重要任務，連地皮都劃晒出嚟，樓價點可能再飛升？二、移民人數不停增加，BB出生人數不停減少，離世人數正常，意即總人口萎縮，單位需求亦相應下降；三、投資物業交N咁多辣招稅，成本太高難回本；四、物業出租，若遇衰客，煩到癲，攞苦嚟辛……

總結：住就可買，投資咪搞！

曾智華

 

阿碌開咪