江若琳認發噩夢 對揸車留陰影

江若琳（Elanne）早前在尖沙咀發生車禍，座駕轉彎時失控翻側，幸有驚無險。昨日是她車禍後首度現身公開活動，她坦言仍需要時間克服駕車陰影，慶幸在車禍前接了囝囝返家。對於好多人到現場打卡Tag她，Elanne坦言尷尬，希望囝囝長大後再沒「江若琳灣」。

江若琳昨日到工展會獻唱，她坦言撞車時不敢相信眼前發生的事，本身有10年駕駛經驗、並非新牌仔，港九新界各區都曾開車，「剷上安全島有啲搶軚，因為想避開嘢，架車大架，翻側咗！當時即刻睇自己有無事，即用P波解開安全帶，最快速度喺天窗逃離架車。」提到現場好多男士前來迎救，她直言人間有情，其實自己已逃出車外，但一班男士很專注，感覺溫暖。
至於座駕是否已報銷及可需扣分？Elanne表示交由保險公司處理，亦不需要駕駛改進課程，因自己不是沒駕車經驗，只是意外，但自覺幸運，因為車禍前已把兒子接返家，她說：「𠵱家對駕車有陰影，要時間克服，暫時由老公做司機，我合埋眼就想起事發經過，仲有發噩夢，但幸好無受傷，只係chok到、撞親個頭。」
對「江若琳灣」感尷尬
問到車禍是否嚇親朋友？Elanne坦言很多朋友關心自己，回覆訊息也覆足三日。早前一家三口到日本旅行散心，她表示囝囝搭飛機沒扭計，又笑言到東京第一次沒行街、吃拉麵，但好疲倦，主要陪囝囝玩。提到老公Oscar在社交網示愛指依然好冧她，Elanne笑說：「我都好冧！老公個人好正能量，發生車禍時第一時間打畀佢，佢叫我唔好緊張同唔好唔開心，佢話爭啲無咗老婆，覺得平安是福，希望2025年唔好太多呢啲經歷。」
屬兔的Elanne直認今年犯太歲，原本覺得自己很好，既出新歌又簽公司，豈料不要亂講，多謝上天庇佑，大難不死必有後福。提到銅鑼灣有「姜濤灣」，而她的車禍地點變「江若琳灣」，她笑言好多人打完卡Tag她，令她覺得尷尬，希望囝囝長大後再沒「江若琳灣」。