黃子華感動《毒舌》港片史上票房稱冠

（星島日報報道）由黃子華 、何啟華、謝君豪 、王丹妮、廖子妤、楊偲泳及栢天男等主演的《毒舌大狀》，上映短短20日，香港累積票房已破8,200萬元，刷新香港史上港產片票房最高紀錄，成為史上港產片第一位。
多位《毒舌》演員懷興奮又感動的心情見證歷史時刻，拍下分享感言。黃子華表示：「講出來都好難相信，《毒舌大狀》竟然成為咗香港電影史上票房第1位，點解嘅？我都唔敢諗，有一日我有份參與嘅電影，會成為百年嘅香港電影史上第1名，我真係未諗過，我自己有咩感受都係其次，我有排都未諗到自己有咩感受，我背脊好似生咗對翼出嚟咁，想鬆吓咁，鬆毛鬆翼。我想問why？點解嘅？點解套戲咁受歡迎呢？我睇過一個觀眾留言，佢嚇死我，佢話從來冇睇過港產片，但佢去睇《毒舌大狀》，係香港人冇睇過港產片喎！都畀我哋吸引咗嚟睇，呢種『深海魚』好難先引到佢上嚟，希望好多『深海奇魚』幫我哋入場睇吓，究竟呢部戲係唔係值得第1名，如果係嘅話部戲仲可以走得幾遠呢？當然已經攞咗第1名，好多謝觀眾，無論第1名可以維持到幾耐，時間唔重要，多謝大家畀經驗我哋。」