CY想跟恩師彭秀慧合作

（星島日報報道）憑節目《全民造星III》而被人們認識的CY，今年決定以真名陳宗澤正式出道，簽約成為古天樂與古巨基的新公司One Cool ChillGOOD旗下首位歌手，日前推出首支派台歌《神經刀》！CY希望成為全能藝人作多方面發展。    
陳宗澤（CY）處男單曲《神經刀》以其稱號命名，而且邀來重量級製作班底，由黃偉文（Wyman）填詞，吳林峰作曲，王雙駿（Carl叔叔）負責監製及編曲。籌備歌曲時，CY向吳林峰要求一種澎湃激情的曲風，成品一出，CY大讚有驚喜：「副歌有層次遞進嘅感覺，一聽到就同公司決定，好鍾意呢隻曲。」而歌詞方面，CY表示：「Wyman填詞後，同時畀我睇尊尼特普（Johnny Depp）主演的電影《幻海奇緣》，錄音前係咁睇呢套電影，覺得《神經刀》歌詞好似我，好似我由細個到參加《造星》經歷的過程。」
覺得很不真實
由素人到今天擁有自己作品，CY當中投放大量心血，他激動表示覺得很不真實：「因為冇諗過第一隻歌個班底已經咁勁，包括拍MV嘅團隊都咁勁。所以其實當呢啲嘢發生咗嘅時候，我心態慢慢唔同咗，我會諗我究竟要點樣做，先可以回報畀公司呢？其實支持我嘅人都等咗呢隻歌好耐，希望之後一路都可以做啲更加好嘅作品去答謝佢哋。」坦言會不斷挑戰自己的CY，希望將來有機會可以自己作曲作詞：「其實我有呢個諗法嘅，有時沖涼靈感一到，哼起音樂就會攞手機錄低佢，但我覺得呢啲經驗要慢慢儲。」
新歌一出即有很人留言支持，當中包括彭秀慧（Kearen），CY當日在《全民造星3》被她指「爛泥扶唔上柄」，被問到現在出道是否有吐氣揚眉的感覺，他說：「一出完呢首歌都有問Kearen意見，佢都有話拍得好好嘅，我哋私底下講笑咁講，『你第一首歌叫神經刀，點解唔搵我幫你拍呢？』」CY表示若有機會都想和恩師合作，「我到今日都係靠《造星》時佢咁樣幫我。」
跟公司想法一致
《全民造星3》完結後，CY並沒有急着出道，反而選擇先增值自己：「當時有同屋企人傾過想試吓做獨立歌手先，但真係有啲難度，又沒有人脈，到最後同呢家公司傾過，發現很投契，例如我用返自己真名嘅建議公司都好支持。」琢磨兩年後遇到現時公司，CY認為時機比起兩年前的他更為適合，而敢言的他當然有向公司表達自己的想法：「我希望嘗試多方面曲風，呢個諗法同公司係一拍即合，佢哋都覺得我可以嘗試多啲唔同嘅嘢，其實基本上我哋冇咩argue，想法一致。同呢間公司嘅溝通好舒服，所以最後決定簽公司。」
希望作多方面發展的CY，也有跟彭秀慧學做戲，他表示：「我自己覺得上Drama同拍戲嘅落差好大，上堂時好多嘢都係即興，拍戲畀我感覺係有一個框框喺度，喺呢個框入邊再自己發揮。早前拍攝電影是一個好好的經驗，亦都可以畀我回憶返學生時期嘅青春。」