吳卓羲被譚耀文 逼供戀情

（星島日報報道）吳卓羲（Ron）、譚耀文與黃德斌等昨日齊出席電影《逃獄兄弟2》優先場謝票宣傳，三人都對戲院重開感到高興，譚耀文開心表示：「Man的感覺返晒嚟，知道戲院暫停下，有好多人在非法平台睇了，但大家都可以再入場感受，戲院有不同。」由於戲院暫停了一段時間，因此第三集將緊接推出，德斌表示是好事，大家睇完第二集會好想快些睇到第三集。
至於是否有機會拍第四集？三子都坦言未知，要睇觀眾反應。而Ron今次加入《逃2》，被德斌形容好打得，是將來的動作明星，他即笑稱：「咩歲數呀？做動作明星，仲要係將來式！」Ron透露今次是眾人中的麻煩友，算是反派，在劇中「搞搞震」感覺很好玩，問他會否擔心因角色而被觀眾討厭？他笑稱是好事，證明觀眾睇得投入。至於是否不能帶女仔去睇？Ron笑言：「我阿媽同家姐都一定會鍾意我。（咁唔帶緋聞女友菊梓喬睇？）我諗鍾意我的人都會入場睇，唔理之後鍾唔鍾意我啦！」
強調並非在屋企夜會
提到菊梓喬被指到Ron的寓所夜會，或者帶對方返屋企睇比較好？Ron則稱：「大家查清楚先，那棟不是我屋企。」問到當晚是否一齊，他即搖頭否認，身旁的譚耀文也起哄笑言：「喺兄弟面前老實啲好喎！」Ron則指講的都是事實，在譚耀文「助攻」下再問Ron是單身還是有拖拍？他即扯開話題，表示集中講電影，譚耀文再以「人生如戲」逼供，Ron無奈表示：「譚哥以為你會幫我，好喇喎！」譚耀文再與德斌取笑指Ron好武功，相信是能保護女伴的好老公及好男友。