張敬仁：我好想搣甩港姐呢個名銜

（星島日報報道）現年35歲的Kendy早在2013年透過參選香港小姐而為人認識，跟陳凱琳、蔡思貝、劉佩玥同屆，更是當年觀眾票選三甲，可惜最後大熱倒灶，落選後沒有簽約TVB，最後成為黃百鳴電影公司旗下演員。看着同屆港姐簽約TVB後一劇接一劇，自己卻還在等待機會，Kendy表示沒有後悔當初的決定：「我諗真係每一個人適合自己嘅路都唔同，其實我冇後悔。如果我後悔，亦唔會知道今日可以遇到呢一個角色，我冇得諗咁多計算咁多。」當初參選香港小姐，曾慘被外界認為貪慕虛榮，Kendy現時一心只想擺脫「港姐」這個名銜：「我而家好想搣甩港姐呢個名銜，難免會有人覺得我想嫁個有錢人，或只是花瓶等。可能真係要用10年、20年、甚至30年，可能先有機會俾大家知道其實我係一個願意在這行花時間學戲、看書進修自己的人。」
遇好角色谷底翻身
Kendy在2017年與吳海昕於《賤民20》演床上激吻，意識大膽，當時引來網民熱烈討論。其後Kendy一直等待另一個機會，她自認資質不高，不會奢求一步登天，但浮浮沉沉的事業曾令Kendy一度患上抑鬱症。雖然自出道以來她都把握每一個機會，但是命運就是要她一步步慢慢走來。相隔五年後，Kendy終於遇到這個角色，就是這次在《反起跑線聯盟》中的Miss Cheung，Kendy坦言這個角色救了她一命，把她從抑鬱低谷帶到陽光正能量。
為了演活角色，要求高的Kendy每一集都會拿劇本出來檢討，還借好友的子女練習，她說：「身邊冇咩朋友有小朋友，我就特登約佢出嚟，帶佢哋去玩。同佢哋去科學館，玩咗一日真係落手落腳湊佢哋，係非常之好嘅經驗。」Kendy一家人全都身在異地，她表示家人在外國也有支持：「我有個姨甥仔，同劇入面嘅小朋友差唔多年紀，所以佢哋都有追呢套劇，我好感動，因為我細佬出咗個post，內容係『我終於可以在電視上見到你的劇了』，之前可能係電影，佢哋唔喺香港，所以未必睇到，今次終於可以真正追到。」
感激男友一路支持
這次Kendy在劇中的演技備受肯定，為她打了一支強心針，現時對她來說最重要的就是讓觀眾喜歡她演的每一個角色，令她可以繼續在這一行發展，Kendy就已經心滿意足：「好想用時間證明比大家睇，我可以做一個演員，而唔係淨係一個花瓶。」
在她人生的低潮時期，她一直困住自己，與她拍拖九年的男朋友在她身邊默默支持，回想起那段時期，Kendy很感激男友：「當我最唔相信自己嘅時候，係佢最相信我，係佢同我講佢覺得我可以做到，叫我keep住個信念一定要繼續行落去。」她坦言二人有結婚的打算，她希望能夠做到事業家庭兩兼顧的演員。