朱晨麗死頂撐佳麗 唔識水性做龍舟鼓手

(星島日報報道)今屆港姐真人騷《We Miss Hong Kong STAY-cation晉級賽》安排28位入圍佳麗入住酒店，由8位師姐帶領分成紅、綠、橙及粉紅4組，參與11天「Stay Battle」，決定其中20位佳麗「Stay至最後」。其中「龍舟Battle」，不諳水性的朱晨麗及張秀文硬着頭皮為組員豁出去做鼓手，朱朱表示：「我真係腳震，因為我好怕水，但我跳開舞可能拍子好啲，所以我舉手打鼓。」

張嘉兒則指「龍舟Battle」有助建立組員間的團結；而嘉兒及馮盈盈帶領的橙組則表示很開心獲師姐送贈小禮物。經過長達11天的相處，一班師姐、師妹培養了好感情，盈盈佩服今屆參賽佳麗，坦言：「雖然嗰時我哋選嘅時候都要外景、拍攝時間長，但今次因為係真人騷，時間再長啲，連休息時都要保持警覺，就算瞌一瞌都有壓力，要保持狀態。」盈盈又謂與嘉兒為師妹們感驕傲：「張嘉兒話班女仔真係好勁，如果畀着我哋當年肯定呢樣、嗰樣都做唔到。」