羅敏莊歎現今歌手難撈

（星島日報報道）羅敏莊（Mimi）將於9月4及5日在九龍灣展貿匯星舉行一連兩場《羅敏莊Live Alive演唱會》，相隔9年後再開騷的Mimi，坦言因疫情關係不時在網上開live show，但今次可以舉行實體演唱會可以與觀眾見面感到很開心，更請來圈中好友黎瑞恩（小恩子）、伍仲衡、黃翊、李志剛等擔任嘉賓即場jam歌。

羅敏莊說：「這個演唱會好想做返我近排曾經做過的工作，好似在電台節目會跟李志剛鬥歌，今次會實體在台上做畀大家睇，更會請來一班嘉賓做王牌。之前我有份演出的《我們的音樂劇Reimagined》，當中有著名音樂家高世章編出好正的原樂，今次我特登搵他幫這個演唱會編制好華麗的原樂，到時我會跟小恩子唱，因為小恩子睇完個音樂劇好羨慕我，所以不如今次整個迷你版本。伍仲衡同黃翊都合作過開live show，我好想請他們做嘉賓，除了可以吸納粉絲外，可以現場畀大家睇live show。」

Mimi曾為ViuTV音樂節目《Chill Club》擔任主持，與新一代歌手jam歌獲不少觀眾大讚歌藝了得。Mimi笑言一直很喜歡唱歌，更形容好爛唱，坊間有十萬個騷，自己都唱了九萬個，更被人問開騷可有練歌？其實沒特別練歌，自己行去咪前就會想唱歌。她說：「今次開騷原因係好耐無見過咁多觀眾，觀眾買得飛就係想捧你場，這種興奮好難解釋，好想見到他們囉！」

歌手出身的Mimi，坦言出道時曾見證過樂壇光輝日子，享受過一日賺三場騷錢，反而現時環境加上疫情，全沒賺外快機會，現今歌手相比以前會辛苦好多。她說：「以前賣唱片賣得好，繼續營運都可以做落去，但現時會將首歌放上網睇下反應，反應好先推出實體碟，但推出實體碟都未必有人買。整個娛樂事業轉變咗，大家都變得好辛苦，但可能因為大家都鍾意音樂，所以先肯繼續捱落去啦！真係鍾意音樂的話，可能有朝一日會有出頭天！要好似MIRROR咁紅，不是一定會發生的事，係需要一個時機，講求天時、地利、人和，當然有一隊受歡迎組合對娛樂圈是好事。」