薛家燕與6呎型男拍廣告 即時回春

(星島日報報道)薛家燕月尾將榮升嫲嫲，BB未出生已經腳頭好好，帶挈嫲嫲與爸爸Jackson接拍果汁廣告，由爸爸執導，嫲嫲做女主角！Jackson更請來6呎嫩口型男做男主角，講起同型男掂手仔，家燕姐都忍唔住「流口水」。

問到同型男合作是否有回春感覺？她笑說︰「個partner叫Daniel，有型又識做戲，睇番playback發覺我哋幾襯，我直情成個青春晒。」問到有冇掂到型男手仔？家燕姐笑指︰「流口水添，眼神好多接觸，手仔就應該冇掂到（你幾耐冇掂過男仔手仔呢？）唔係好耐啫，我成日同人握手嘅，哈哈！咁拖吓手仔都係禮貌嚟，你知我隨和，又充滿偉大嘅愛。如果真正拖手仔呢排就冇喇，可惜因為疫情關係，大家要天各一方，惟有靠手機同電腦傾偈，希望可以快啲拖到手仔啦！」