爆父母早已離婚 黃樹棠兒子：毋須內疚

(星島日報報道)資深藝人黃樹棠因肺癌病逝，兒子黃榮璋（章魚）凌晨在社交網撰文抒發掛念亡父亡母及親恩之情：「唔知點解對眼好似閂唔到個水喉，我好似一路記返起晒以前好開心嘅記憶，佢哋由細開始就好錫我，阿媽唯一一次揸住衣架想打我，追追吓都會變成一齊大笑，好開心咁冇咗件事，阿爸係一個武功高強嘅人，佢實打過我？對唔住，係無！佢兩個錫到我燶……而家兩個都唔喺度喇！媽媽嘅事好不容易先可以放下……佢哋不約而同地喺走前都有提及離婚嘅事，對我嘅影響係最大，有點點對我抱歉！」

棠哥早年與胡桂蘭結婚並生下兒子（章魚），2005年胡桂蘭因癌病離世，棠哥一直沒提及離婚消息，直至他死後，章魚懷念亡父亡母，透露童年時父母已離婚，令棠哥感到內疚，不過父子相依為命感情好深。章魚留言安慰父母不需內疚：「但係因為咁，我先有一個不一樣嘅童年，我而家想同你哋講，你哋對我好好，唔需要內疚，我一樣都係幸福的！你哋兩個都係我最重要嘅人！教識我好多做人嘅道理，近呢十幾年我都同我爸相依為命，似兩兄弟多過父子，你冇錢有我頂住，我冇錢有你頂住，出生入死，雖然拗撬一定有，但係父子冇隔夜仇，引用阿爸近年每日都會講嘅一句，我永遠都會記喺心，人唔需要貪心，要知足，『簡簡單單又一餐』便足夠了！我好掛住你呀！爸爸！」