莊韻澄願為囝囝收起性感

（星島日報報道）懷有牛BB的準媽媽莊韻澄（Xenia），早前為迎新歲和為BB買金飾到珠寶店搜羅心頭好。她直言祈望兒子將來好像牛仔般勤力，不要有牛脾氣變「牛精仔」，但最緊要孝順同身體健康。

莊韻澄（Xenia前名莊端兒）於去年11月與圈外男友呂成忠（Joe）閃婚，相隔一個月後在社交網宣布懷孕喜訊，預產期為今年4月。趁着踏入新一年，身為牛年準媽媽的Xenia，到珠寶店睇金牛擺設外，更為腹中寶貝仔購買BB金手鐲及飾物。莊韻澄笑言雖然BB未出世，但媽媽經已送贈了金手鐲及銀手鐲畀未來孫仔，亦有不少親戚送來金器飾物，所以快榮升做媽媽的她，也應該買BB金手鐲送給兒子：「我鍾意金仔金器，跟番今年牛年，而且要意頭好，我睇中隻BB手鐲，因為寫上『聰明伶俐』，又有噹噹，好得意呀！」快將成為人母的Xenia，坦言心情有點緊張，愈近預產期就愈緊張，希望兒子將來好似牛仔一樣勤力，不過不要有牛脾氣變「牛精仔」，最緊要孝順同身體健康。

原名叫莊端兒的她，由師傅為她改新名字為「莊韻澄」，有指新名字旺桃花。而改名後的莊韻澄，的確火速成為人妻兼準媽媽，她笑言去年自己頗為突破，皆因上半年完全無想過會發生。「我都會諗如果拍拖就會想認認真真，拍拖會諗住結婚。我都相信命運，改名後的想法都有改變，以前會覺得一個人好好，無需要煩，拍拖要煩埋另一半，後來師傅同我講：『你做女人真係要有個歸宿！以前個名歸宿唔好，不如改名啦！』我聽完之後，可能自己思想上都有改變，會打開度閘去接受一些人對你好。改完名後覺得一、兩個月後改變，工作好順利，愛情亦很好，生仔好講求緣分。師傅當時仲同我話會結婚，仲會生個牛仔BB，我仲覺得邊有可能？準到有點打冷震，仲話我們兩公婆的八字，如果生仔的話會好旺，我都好期待。」

談到將來可會追生女兒？她說：「我老公好想生女，但是依家肚內是仔，所以都會再追生。如果再生的話，不是生女就算啦！」

去年全球疫情爆發，香港各行各業大受影響，娛樂圈無論幕前或幕後工作崗位亦無一倖免。不過莊韻澄仍頻頻有幕前工作，更進軍飲食界。「我覺得去年的工作量算是過得去，每個月都有少少工作，並不是完全停工。雖然都有停工的日子，當較靜的時間就轉去從商，其實2019年開始會做吓代言人，之後發展好多飲食事業，代理一款馬來西亞的鹹蛋黃魚皮，今年亦有做盆菜生意，又有跟食品工場合作推出食品，向着食品商界發展。去年都參與幾個viu TV節目，希望將來有親子節目搵我參與。」

懷有身孕的莊韻澄，坦言沒有孕吐情況，只肥肚四肢仍纖瘦，飲食方面也沒有改變，但臨盆在即會暫停工作，以免令大家擔心，計畫兒子出世後會坐月：「好多人叫我請陪月員，我好想親身感受一下做媽媽的感覺，雖然好多人話好辛苦，但我真是好想嘗試，自己細個都是媽媽親手湊大，我不想錯過這些日子，就算請陪月員都只會想照顧我，而不是照顧BB。」

對於牛年工作大計，莊韻澄表示有了小孩後，從商方面會更多小朋友食品，演藝工作亦不會停止，若有適合也會接受，更曾有人接洽她演繹孕婦角色，不過暫時未開拍。向來形象性感的莊韻澄，直言成為人母後也會收起性感，現已漸漸收起，不過劇情合理也會接受性感演出，但不會行刻意走性感路線。