政府敷衍回信 小股東慘「變性」

(星島日報報道)近期證監會嚴查細價股，不少「股仔」都因此要停牌，散戶被變相凍結資金，自然唔高興。替散戶維權的小股東權益關注組召集人劉東霖更去信特首，要求關注事件，點知慘遭「變性」。

事緣劉東霖收到特首辦公室的回覆，話已將事件轉交給財經事務及庫務局處理，不過呢封回信就出了一點小錯誤，誤稱劉東霖為「劉女士」。劉東霖明明係一個雄赳赳的壯漢，點解會變成女士呢？

講番小股東權益關注組，佢哋昨日又去長江中心搵證監會請願。由於長江中心的管理公司向法院拎咗禁制令，因此示威者都無逗留太耐，只係圍繞住長江中心行一個圈，之後就喺對面馬路喊口號。

不過，示威者仲未罷休，佢哋話要將行動升級，包括動員一萬名小股東一人一信寫畀立法會議員，要求立法會介入，召開公聽會和傳召證監會的代表，正面回應小股東的訴求。一眾小股東有咁大決心，睇怕證監會都有排煩。