(星島日報報道)名模周汶錡昨剖腹再誕一子,取名為Avner,重7.8磅,其老公Julien現身嘉諾撒醫院表示會留過夜陪太太,更大讚仔仔好Cute,對於會否追個女,他就話暫時照顧咗細仔先。至於被傳昨日會產女的謝安琪,其老公張繼聰即在社交網站稱老婆仍然優雅咁喺屋企行嚟行去。

  雞年旺添丁,不少人妻級藝人都整裝待發,隨時迎接新生命的到來。早前外界傳出謝安琪會在20日產女,大批傳媒昨早到醫院等候,但怎知謝安琪未作動,張繼聰隨即在社交網站上載一張粉紅蝴蝶結的相片,並留言寫上:「事緣之前有報道話我嘅囡囡今日出世,搞到我個心都離一離,繼而這兩日收到好多記者朋友嘅詢問。多謝大家嘅關心,明白、收到晒,不過今日我仍然要繼續工作,太太這刻仍然優雅咁喺屋企行嚟行去。」最後更指小朋友的來臨是人生最幸福的事,他與老婆多謝大家祝福,亦講明囡囡出世,一定會同大家分享喜訊。

  另一邊廂,名模周汶錡個細B卻搶閘出世,她昨午於嘉諾撒醫院剖腹再誕一子,取名為Avner,重7.8磅,其經理人Simon指BB樣子似足爹哋Julien,還透露Julien看見幼子出世後即驚呼:「Is a Big Boy。」

  昨晚7點左右,Julien拿着一套西裝和日用品的現身醫院,記者即上前恭喜,他即報以笑容表示多謝。問到是晚會否留過夜,他說:「我會。(BB外表似邊個?好似你咁靚仔?)佢好Cute,都似媽咪。」講到細仔取名為Avner,有甚麼意思,他說:「Father of Light(光之父的意思)。(Kathy情況如何?)OK,佢好開心。」他被問到會送甚麼給太太,他即故作神秘說「Surprise!」至於會否再追女,他謂「who's know?目前都係照顧咗細仔先。」隨後,戴黑超的上山詩鈉離開醫院,相信是剛探望完Kathy,等Julien來「接更」再走。

  Kathy亦透過公關宣布喜訊說:「細佬比較似爸爸!本以為第二次生BB心情會輕鬆一點,但可能就是因為知道整個程序,反而比上次更緊張!我和老公都很開心為Jacques添了一名弟弟,雖然今胎都係囝囝,但我和老公都無所謂,兩兄弟可以一齊玩嘛!身邊朋友都不停慫恿我追番個囡囡,還是一切順其自然吧!」

  現時佗B八個月的楊愛瑾(Miki)就同老公、好友們舉行Baby Shower派對,現場布滿多個大大小小的氣球,身穿粉紅色衫的Miki和老公更手握手齊齊切蛋糕!Miki在社交網站以英文留言講話臨生前這一個月很忙,又要忙於準備BB的東西,而且陪月更通知因私人原因而甩底,令她更是手忙腳亂。