李辰安 - 茅台冷知識｜辰來之筆

今日又去黃昏酒聚，大步行過去中環大街小巷，都聽見有人話想試下國產茅台咖啡，點呀，幾時有玉冰燒港式奶茶？

大師兄首先發炮：「安仔，今日你先學人講茅台，過晒時啦，乜鬼話題都噏厭，其網上洗版同偉仔攞終身成就獎有得揮。」講呢啲，我問你三個茅台冷知識，你識得答無？「一、邊個係茅台酒國際代言人？」張翁在旁已經搶先答︰「佢就係尼克遜。」果然係前輩，於是大家坐低，飲杯葡萄牙有氣紅酒，慢慢講故事。

國產茅台咖啡成為內地熱門話題。

國產茅台咖啡售價不菲。

茅台是內地名酒。

內地酒市場發展蓬勃。

幾時有玉冰燒奶茶？

茅台酒威到去白宮

話說1972年2月21日美國總統尼克遜訪華，落機第一步，已經諗到好多細節，不過與中美關係無關，而係第一次踏足這個千年神秘古國，會有乜嘢可能發生，例如國宴會否出現飛禽猛獸之類的「珍貴」食材？殊不知，一切正常，都係烤鴨、大蝦、燒肉同埋魚，不過，真正眼界大開係首次亮相國際大場面的茅台。

「世侄，你知唔知美國人做情報工作有幾細膩，原來一早已經得知周恩來總理到時與尼克遜敬那杯酒，係好勁揪，到時千祈千祈唔好㗳落喉，用嘴唇碰一下就好啦。」但係點解尼克遜做咗代言人？佢都無飲過茅台？

在回答呢條IQ問題之前，大家先來一Round啤酒，大師兄話，根據基辛格《白宮歲月》回憶錄，尼克遜弊在帶咗樽茅台返屋企，「你知啦，屋企即係白宮總統府，佢都幾搞事，同個女講，呢種中國酒可以做飛機燃料，於是將茅台倒在碗裏點火，殊不知，火舌乘勢湧上，成張枱都燒起來，如果不是及時撲滅，成座白宮可能燒起來。」如是者，在美國人心目中，尼克遜與茅台不可分開。

好，想同大家科普一下，廣東名釀玉冰燒真係關肥豬肉事，原產地大灣區佛山，主要是將米酒浸過肥豬肉提煉而成，「所以話，唔好以為茅台溝牛奶咖啡好出奇，中國文化真係精心博大。」靚仔侍應碧咸仔推薦，可以加青檸檬同冰，試下無妨。「你不如用玉冰燒沖杯港式奶茶，可能試出彩虹，返大灣區開連鎖店，然後上市做年青才俊啦。」

茅台，你聽得多， 1940年代之老茅台拍賣幾多錢？銀行偉話︰「呢樽茅台拍出172萬人仔，網上有得查，不過，之前有好多不同炒作，10年前有一樽漢帝茅台，因為限量所以炒到天價890萬港紙。」內地之茅台咖啡都係用3千零人仔之飛天茅台做原料，其實好相宜。

茅台咖啡一炮而紅

張翁話，愛爾蘭咖啡都係用威士忌做基底，之不過，以前無人諗得到茅台咖啡咁有中國風，而且仲要一炮而紅。「幾十年前，就算尼克遜當上茅台代言人，茅台都係好平啫，上內地飛機航線都有得過你飲，當時揸港紙，真係可以一百幾十買一瓶，早知可以如此值錢，我就買幾箱返香港啦。」

好啦，最後一條問題，茅台係乜酒？貼士︰唔係米酒。碧咸仔行過嚟︰「我細細個都知茅台係高粱酒啦。」錯，唔係完全高粱，而係有小麥成分。不過，你講得出高粱，都算你有國學常識啦。

「安仔，幾時食晚飯，大家開支茅台歎下呀！」好，不過，飲茅台唔一定食中菜，食西餐都可以，因為有酒有菜，但係人情先至最緊要。「好，不過都係食中菜啦，你攞樽茅台去西餐廳要人幫你開，都好招搖噃。」不過，香港無幾何見到有貴州菜，不如食川菜配茅台，好唔好？大家無意見，一於等陣過去買茅台，潮呀！

 

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ