李辰安 - 印度返工戴頭盔？｜辰來之筆

印度Office高風險 唔知點算？

印度打工仔要戴頭盔先至夠膽返工。

印度政府Office日久失修，成日跌天花。

印度打工仔戴頭盔返寫字樓工，真係算領先全球。

印度Office成日跌天花，打工仔有危險。

印度政府Office日久失修，成日跌天花。

我忽然感覺自己好幸福，老闆對我同一班同事太好了，要是我在印度打工，我真係唔知點算？

大師兄首先講：「安仔，有乜點算，你去印度移民咩？」佢一早坐咗喺大堂正中央嗰張枱。「我真係唔會搵命博，我又唔貓。」茶樓老闆一個箭步走過嚟，想同大家約個時間遊廣州。「好方便咋，依家去天河食飯，話咁快就到，搭廣州東站好方便。」張翁此時趕到，聽見廣州成個生晒︰「係啦，以前去廣州搭柴油火車，成半日都未到。現在個零鐘就直達中心，好似發夢一樣。」

「係嘞，世侄，你講乜嘢唔似貓唔似狗，係咪想食魚翅餃，叫老闆幫你Order。」老闆話，慢慢嚟，唔使急，飲杯茶先啦。「老闆，我其實想食粉果，不過，魚翅包都可以，我唔係又貓又狗。」大師兄一句「九唔搭八」就走過場。銀行偉問我幾時去印度？「不如叫個蒸排骨，老闆話必食。」大家飲茶，今日老闆精選係十五年普洱茶頭，好特別，飲落好似無乜味，不過，又有一啲樟木之類味，老闆上個禮拜去深圳探茶葉舖嘅潮州佬，帶咗幾斤返來，慷慨同大家分享。

大家坐定定，想搵個有趣話題，銀行偉就話三年疫情搞垮好多行業，其中曾經暴發幾千億美元市值之共享空間企業，聽講就快執笠。「一場遊戲一場夢，疫前個個唱好，香港都為此主題投資發癲，不過，依家好多大公司已經學識Work from home。」大師兄話︰「佢表妹個女，本來要往返香港仔同中環公司上班，疫情齊齊Work form home，Work下Work下，大家要Work，使乜返公司，網上辦公就得啦，於是疫情之後，大家留在家中。」嘩，呢間係跨國大集團呢㗎，咁縮骨都得嘅，香港啲Office仲使租得出。

張翁話︰「做生意講成本效益，應使得使，應慳則慳，你知香港租金有幾貴，可以Work from home，以後唔使成日返Office，老闆Happy，夥計又開心。」係，你知返Office有好高風險。「安仔，你又九唔搭八，呢度係香港，唔係敍利亞，或者烏克蘭，有幾危險，唔通你驚中暑。」魚翅包又即係魚翅餃，原來無分別。「我講，上班好危險係指印度。」

成日跌天花 打工仔戴頭盔返工

老闆介紹大家食咖喱牛肉炒底，「李先生一定鍾意啦。」唔關我事，我其實話，印度打工仔要戴頭盔先至夠膽返工。「你無睇新聞咩，印度政府Office日久失修，成日跌天花，員工向上司申訴無果，為咗份工，只好自己想辦法啦，戴頭盔返寫字樓工，真係算領先全球。」

即係咁，我又唔係貓，無九條命咁多，所以慶幸唔係去印度返工，同時覺得我老闆好偉大，起碼租一間四四正正Office畀大家開工，我唔戴頭盔都可以安心工作。「安仔，現在中環、灣仔、旺角、油麻地周圍好多舊樓都有老化問題，石屎隨時剝落，你最好出街戴頭盔啦。」講呢啲，好啦，老闆推介之咖喱牛肉幾好，不過，椰油味略重，唔多夠勁。「安仔，熱氣呀，食到咁辣，你幾十歲，注意調理身體。」好，飲多杯陳年普洱，通通血管先。

老闆話，廣州有政策，加快舊區重建，香港咁多舊區，都可以諗下積極改善環境，舊區重建騰出嘅單位優惠後生仔，吸引外來人才，一舉幾得。「世侄，飲茶啦，講呢啲。」銀行偉近日個樣好愁，可能與樓市同股市唔多順有關，都係換過話題，幾時去西九搭高鐵上廣州？周圍去搵美食，幾開心呀！

 

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ