李辰安 - 年年二十五歲咩！｜辰來之筆

無限活力 值得學習
 

「年年二十五歲」譚詠麟，好值得香港人學習。

七十歲踢波好閒事。

譚詠麟開幾場大型演唱會，又飛來飛去，同班後生仔踢波。

日日運動三十至四十分鐘，老人家最適合。

日日運動三十至四十分鐘，老人家最適合。

今日飲茶，見到張翁瘦咗好多，有乜問題？唔通又學人唔認老，唱歌加踢波，搞到幾日跌十幾磅。

銀行偉話：「安仔，張翁有能力有魄力，玩下玩下，天氣又熱，咪當減肥。」茶樓人客疏落，可能落雨又悶熱，不如坐辦公室休息。「世侄，我邊有去踢波，你估我係年年二十五歲咩，人哋本事，我最多都係游水曬太陽。」係噃，張翁後生打英式欖球，佢家學校係傳統英式學府，踢波好似唔多曉。

銀行偉自言最叻打羽毛球，一身輕盈又有彈力，造型瀟灑，踢波，唔好玩啦，佢見過朗拿度踢世界盃，已經放棄少林足球之夢想。「我就話踢波好嘞，一對白飯魚走天涯，當年大頭仔都係好似我細個咁，踢硬地足球，之不過，我要去鄉下讀書，所以放棄足球生涯。」我一邊食燒賣，一邊聽大師兄吹水，想當年，佢踢波都係論論盡盡，乜鬼嘢足球生涯吖，執波都嫌你唔夠醒，之不過，我無講出口，只係搭句口︰「燒賣好燙口，大師兄小心，唔好掛住講。」

張翁話，同佢差不多年紀之「年年二十五歲」譚詠麟，好值得香港人學習。「人生七十開幾場大型演唱會，又飛來飛去，同班後生仔踢波，可能有人網上留言話佢大肚腩，於是乎，馬上減十零磅畀大家見識下。」

 

心境年輕 量力而為
 

我好似聽講「年年二十五歲」並無咁誇張，依家已經回復正常。「七十歲踢波好閒事，我見到灣仔有個街坊，八十歲嗰頭，都滿場飛。」其實只要大家心境年年二十五歲，人生再無年齡阻隔，如果可以，爬喜馬拉雅山都可以。「就聽你講，搞一場珠穆朗瑪峰演唱會，網上開Live，全球見證，有無得諗？」我就話，張翁你肯贊助一定無問題，你咁有興致，使錢無問題啦。「世侄，你去珠峰開演唱會我就會贊助。」你唔好大我，等我返屋企考慮下先。

食完燒賣，忽然見到魚王行過，佢話不如揀隻西澳龍蝦二斤重，起肉炒球，好清新噃。「魚王，你真係好介紹，下次嚟食晚飯先啦，今日不如灼斤海蝦啦。」張翁話食海蝦有蛋白質，可以防止肌肉流失。「近日減磅，可能係天氣問題，又可能身體新陳代謝有問題，所以我都唔食粥粉麵飯啦，食多啲蛋白質。」無問題，我話人生七十，點都要小心飲食，得閒多啲運動。「不過，千祈唔好太過劇烈，超人話齋，量力而為呀。」

超人叫後生買樓量力而為，好似無叫人家運動量力而為，之不過，都係有道理，有醫生教落，日日運動三十至四十分鐘，老人家最適合。「不過，我見到史泰龍伯伯，同埋阿諾舒華辛力加公公，七老八十都日日舉鐵，成百斤咁舉，點計數？」張翁話，舉重運動都好重要，配合跑步、游水之帶氧運動，咁就Very Good啦。

銀行偉話，人到五十就要養生，最緊要唔好有咁多壓力畀自己︰「嗱，打一個唔係太啱聽之比喻，當你可以參加中年選拔賽之時，仲未有能力買樓，咁你就唔好再咁博，一日做足十個鐘都無希望啦，不如放鬆一下，Hea做，唔好急，再唔係就轉工，有時做保安都有益又健康，好似我樓下嗰位阿伯，面色紅潤，見到人都笑，你估佢咩料？係英國大學生，退休搵份輕鬆嘅工。」偉哥住半山豪宅，嗰頭嘅保安管理人員英文了得，一早就知道臥虎藏龍，大學生有乜問題，內地大學畢業生好多要搶住做外賣車手。

「好啦，食嘢食嘢，飲啖茶，養下生。」係，大家輕鬆。
 

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ