李辰安 - 寶島大狂歡｜辰來之筆

台灣巨星涉不雅行為
 

藝名「黑人」的陳建州（圖左五）遭女星斥性騷擾。

炎亞綸近日遭網紅耀樂指控強逼發生性行為，他在記者會向耀樂道歉。

炎亞綸近日遭網紅耀樂指控強逼發生性行為，他在記者會向耀樂道歉。

黃子佼遭控強吻少女等，他坦承過去犯過錯，並爆出其他藝人的醜聞。

黃子佼遭控強吻少女等，他坦承過去犯過錯，並爆出其他藝人的醜聞。

上網睇八卦新聞，寶島近日好似俄羅斯咁亂，好多知名巨星涉不雅及不法行為，我一聲長歎……

是日好心情，事關工作做妥，無後顧之憂，係時候諗下放大假去旅行。行到入去中環小酒館，原來已經人齊，仲開始擺開個龍門陣，好，快啲行埋去，聽下講乜先。「世侄，你想唔想知馬騮闖入民居大鬧兩粒鐘時，最後由專業人士用香蕉請佢入籠，先至平息事件。」咦，張翁乜你唔係胸懷千萬里咩，講股講匯講國際時事係你擅長，你唔係講中美關係，普京個廚師因何出位出事，點知轉頭講民生趣怪事，確係心事細如絲囉。

「安仔，唔好九唔搭八，民生無小事，更何況走隻馬騮入屋村，可大可少，既涉環境生態，又反映人類同情心，呢啲新聞應該關注。」我望下銀行偉，佢無表情，只係展示出一副好假之笑容，我一時之間亦搵唔到嘢同大家講。「不如我請大家飲杯冰凍啤酒，賀下隻馬騮無事，大步檻過。」我其實想講，今時今日無人關心世界大事，原因好簡單，因為缺乏娛樂性，任何大事都係意料中事，邊夠隻馬騮入屋咁引人入勝，仲有，大家有無發覺坊間最Hit新聞係搵三幾十年前明星名人做比較，乜乜脹爆到唔認得，某某六十歲好似十六歲，當然，少不免又攞上世紀八十年代之男女拍拖緋聞講。唉，唔通連德高望重嘅張翁都有興趣？

大師兄細細聲講︰「你估張翁係超人？人點會唔八卦，何況佢老人家咁活潑，又跟得上潮流，好似邊個邊個個女結婚，新郎型過外父，呢單嘢畀佢講足半個鐘頭。」張翁同其他酒友打完招呼行緊過嚟，我同大師兄即時轉換話題。

成籮黑歷史 問你點算好？
 

「講開又講，寶島演藝界好似爆咗個核彈咁，你噏得出嘅明星，原來都有成籮黑歷史，問你點算好？」有乜點算好，最好請教張翁。「世侄，你哋都係細啦，男女相親自由民主為原則，有乜係黑歷史？除非涉非法不良嗜好，咁就另計。」

話說，香港有位粵劇界前輩，幾十年前上電台暢談圈中緋聞，佢就話︰「好似我哋喺粵劇團出身，後生細仔學做戲，跟劇團穿州過省，日日好似露營咁，旅途寂寞，但隔籬就係異性團友，咁你話點呢？其實大家思想好開通，你明啦！」張翁話，你以為台灣係一個一塵不染之小確幸文青之地？大家都係飲食男女，之不過，爆出嚟，變咗八卦新聞，咁好多旁觀者就會指指點點起哄。

好嘞，話咁快飲完一Round啤酒，不如換個話題啦。「我都好想去寶島行下，好耐冇去，你知道嗰度有好多嘢食。」講開台灣美食，我細細個同屋企人過去四日三夜遊，一日三餐幾乎都喺街邊食，有推車仔和大排檔等等，印象中係好好味，不過當時係暑假，無冷氣都幾辛苦，上一次想過去搵返兒時記憶，點知已經無街邊美食，好在台灣小店小廚都好有水準，所以十分滿意。

「台灣好熱，邊有人7月、8月過去，又熱又成日打風，最好係11月中出發。」張翁提議不如去順德啦，酒樓老闆上次去完返來，畀咗個地址佢，可隨時去歎美食，係陳村菜正宗。銀行偉就反建議︰「搭高鐵去潮州汕頭，仲多好嘢食。」講老實，天熱又打風，今個月都係一動不如一靜，去本地主題公園嘅靚酒店Yeah下穩陣。「安仔，你想探米奇、米妮？咁得意。」無乜問題，其實我想同巴斯光年影相，大家幾時一齊去吖。

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ