李辰安 - 熱到爆熱到喊｜辰來之筆

香港開埠百多年，又有第一次，我有幸親身見證，嘩，真係熱到唔講得笑，唔知你又點睇呢？
 

天氣酷熱，市民應提高警惕，多補充水分及做足防暑措施。

夏日天氣酷熱，大家應提防中暑。

市民自備小風扇降溫消暑。

紫外綫高企，可帶遮防曬。

烈日當空，小孩子嬉水降溫。

紫外綫高企，可帶遮防曬。

炎炎夏日，大家都到泳池進行下水禮。

烈日當空，小孩子嬉水降溫。

以毛巾遮擋炎陽降溫。

以手遮擋炎陽降溫。

上街頭暈暈、眼花花

我今日頭暈暈、眼花花，行過去一條街距離之小酒館，好似大空人登月漫步，浮下浮下，似幻疑真，好啦，到達啦。大師兄一身清涼打扮，如果可以嘅話，佢可能要着短褲，再加對人字拖。「安仔，你就係咁九唔搭八，我打公家工，大部分時間坐Office，返工要執到正，如果我有朝一日調咗去戶外體力勞動崗位，就可以着背心開工。」

香港有史以來在6月之前發出第一個極端酷熱天氣警告，當時係正午12點半，我在中環街上，想早少少去銀行，殊不知，好多人都偷雞，午飯前就入嚟排隊，望過去好似要排45分鐘，不知如何是好。「世侄，銀行有冷氣，你出去盞搞啦，後生細仔就無所謂，頂得順，你就唔好亂嚟。」張翁，我去銀行都係搞啲重要但非緊急之項目，人多就唔好嘥時間。銀行偉問我，乜無網上銀行服務咩？係呀，我幾十歲啦，邊似你哋咁前衞。

飲啤酒的確好消暑，但係飲完之後，成身爽晒嘅時候，就好想瞓覺，你知日日都攝氏三十幾度，個人特別累。「咁你不如坐的士返屋企啦，你個樣都好似唔夠瞓呀。」其實都係，因為房冷氣好似日久失修，唔夠涼，搞到半夜眼光光。
 

香港精神 幾艱難都捱得過
 

「世侄，上世紀六十年代我最記得嗰年又熱又無水，成條街都係人，排長龍等攞水。」不過，好彩張翁係大富之家，當年搵人開個科學井，於是大致解決難題，唔係就要出街排隊，少爺都咁話。「原來市區地下都有水源，我仲以為鄉下先至有。」大師兄，你有所不知，當年市區邊有咁稠密，依家周圍都係石屎建築，你就想可以開採鑽探地下水。

「當年開科學井好熱鬧，就好似發現石油咁高興，打個井起碼要七、八萬元，可以買到太子道中產住宅，你估好簡單？」唉，香港幾艱難都捱得過，制完水又有大風災，呢啲咪叫做香港精神囉。

銀行偉想當年，跟老闆去澳門洽商大生意。「氹仔有家亞洲至豪嘅酒店，想融資強化經營，於是一齊去酒店開會，嗰家酒店有一個好大嘅泳池，側邊有個水中酒吧，大熱天時，你一邊游，一邊去酒吧Order杯冰凍啤酒，真係有如人間天堂。」之不過，偉哥當年得個睇字，老闆日理萬機，即日坐噴射船返中環。「仲未講完，返到中環，我要上Office做計畫書大綱，結果夜晚九點幾至有得走。」

偉哥，老闆有心栽培你呀。香港地，梗係以效率為先，唔係邊可以創造出上世紀八、九十年代之黃金時代。「老實講，嗰單生意無乜料到啫，不過老闆就見到有我呢個助理，於是明知唔多會成事，都要我即刻整好份嘢。」嗰家酒店我都有印象，不過已經成為集體記憶，又或者係文化遺產，今時今日澳門多咗好多超級豪華酒店，誇張到你唔信。

「講開澳門，幾時又去？」我興趣唔大，想當年，氹仔係小鎮風光，人又少，澳門人行路都慢過人，未去到酒店都已經好Relax，依家再無呢種Feel，澳門同香港有乜分別？大家都係周圍人山人海，食嘢要排隊，去酒店Book餐廳要網上預訂，一頭半個月都無位，我就寧願一動不如一靜。「世侄，成個大灣區都咁多人，你不如去青海省修行啦。」呢個都係好提議，有得諗，不過依家飲多杯先，食完飯快啲返屋企休息。

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ