李辰安 - 悲過韓劇｜辰來之筆
2023-05-23 00:00 
韓星是後生仔最羨慕的一群，不過，近日爆出韓星背後的辛酸史，明星公司拖糧爛尾，好慘啊！
韓國娛樂演藝 贏過香港同日本
網上傳來內地經濟不景消息，兩成後生仔打工無着落，有得開車做外賣已經算好，睇完心都噏。「安仔，內地大學生多，千幾萬人畢業湧出嚟，喺大疫過後日子，試問仲有乜筍工可搵！」我同大師兄畢業之時，亦都好煩惱，因為前景唔明朗，我哋一班同學仔打信求職，個個都超過百封，不過，幾乎無回音，有位理科同學過咗暑假都無着落，為咗唔想家人擔心，一於努力搵工。「係呀，我都記得佢，去咗沙田某商場做保安，做咗大半年，先至去私校教書，講下講下，幾個十年，當年大家都好焦慮。」
張翁剛到，先來一杯威士忌加冰，大家要醒醒神，唔好掛住想當年。「經濟年年都有好有唔好，俄羅斯有壓力，不過，原來經濟反而有增長，美國同歐洲就唔多好，所以老人家話齋，好唔好睇得咁好，淡唔好睇得咁淡，平常心，呢個世界又點會無挑戰。」銀行偉加多句︰「金融大鱷傳來大吉利是消息，但係已經闢謠，佢仲好精神。」
好啦，大家飲杯先，當係賀下大鱷身體健康，長命百歲。「香港似乎畀佢老人家炒起，搞到人心惶惶，畢業搵工好頭痕。」大師兄，亞洲金融風暴嗰陣，搵唔到工都唔算淒涼，韓國金融崩潰，全國上下要捐出金器救國。「辰哥，韓國幾乎破產，好彩有世界銀行等機構肯借錢，助佢哋渡過難關，唔係就真係唔得掂。」
之不過，韓國自此之後，舉國奮發圖強，後來又有高科技成就，手機賣到世界第一。「仲有，自此之後，韓國娛樂演藝都有好大進步，今時今日已經贏過香港同日本，係亞洲Number One。」究竟韓國有乜秘訣可以如此華麗轉身？「世侄，韓國人好勤力，考試壓力勁過香港好多，所以人家成功有原因。」
大明星被拖糧 辛苦錢不知去向
話雖如此，最近有消息指韓國大明星被公司拖糧，成幾百萬港紙，反映韓國風光背後有隱憂，事關韓國女子組合嗰位Lisa姐，都曾經被經理人食夾棍，辛苦錢不知去向。「係囉，韓國演藝界好大壓力，你睇Lisa同佢幾姊妹好似成日都笑口常開，但係有側面消息報道，佢哋生活全無私隱，日日都要笑面迎人，好辛苦。」真係無陰公，犧牲咁大，仲要畀公司食埋人工，變成白做，點算好？春青有限，阿姐變阿姨容乜易，到時轉行？
「最感人係韓國大明星被拖糧話生活無影響，仲要主動向有需要人士施以援手，幫無糧出嘅同事睇醫生。」唉，唔通呢啲就係韓國版之「人人為我，我為人人」，幾時拍套賺人熱淚之韓劇？「我就話，韓國唔方便拍或者唔想拍，可以搵晶哥諗諗，整套合拍劇，應該有噱頭。」大家又舉杯勸飲，做人最緊要開心。
「安仔，你都九唔搭八，人哋咁慘，你就當噱頭，真係涼薄。」大師兄，人間悲劇向來係電影好題材，華南影帝電影系列，乜你無欣賞過咩？「好啦，今日不如到此為止，講啲開心話題。」大家講炒股同炒樓，呢排都好似幾好景……
「幾時去首爾旅行？聽講嗰度有好多打卡點。」我就好想去首爾食炸雞加啤酒。「辰哥，野蠻女友條橋都成十年咁耐，你有無Update一下啲韓流娛樂？」我又點會有你咁In，我都費事同你講，飲完酒，不如去食韓國燒烤，你點睇？
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應